رووداو دیجیتاڵ
وەزارەتی کشتوکاڵی عێراق هاوردەکردنی شەش بەرهەمی کشتوکاڵی لە دەرەوەی وڵاتەوە قەدەخە کرد کە یەکێکیان تەماتەیە. وەزارەتی کشتوکاڵی هەرێمی کوردستانیش دەڵێت، هاوئاهەنگن و بڕیارەکە بۆ پاراستنی بەرهەمی نێوخۆیە.
وەزارەتی کشتوکاڵی عێراق، رۆژی سێشەممە، 2-12-2025، لە راگەیێندراوێکدا قەدەخەکردنی هاوردەکردنی تەماتە، کەلەرم، قەڕنابیت، کاهوو، شێلم و چەوەندەری راگەیاند.
بە گوێرەی راگەیێندراوی وەزارەتی کشتوکاڵی عێراق، بڕیارەکە بەهۆی زۆریی بەرهەمی نێوخۆ و لە چوارچێوەی جێبەجێکردنی بڕیاری ئەنجوومەنی وەزاریی ئابوورییە بە مەبەستی پشتیوانیکردنی بەرهەمی نێوخۆ و پاڵپشتیکردنی جووتیاران.
هیوا عەلی، گوتەبێژی وەزارەتی کشتوکاڵ و سەرچاوەکانی ئاوی هەرێمی کوردستان، رۆژی سێشەممە، 2-12-2025، بە تۆڕی میدیایی رووداوی راگەیاند، پێشوازی لەو بڕیارە دەکەن.
هیوا عەلی رایگەیاند، هاوئاهەنگییەکی تەواویان لەگەڵ وەزارەتی کشتوکاڵی عێراق هەیە و بڕیارەکەش بۆ پشتیوانیکردنی بەرهەمی نێوخۆیە.
