رووداو دیجیتاڵ
قوباد تاڵەبانی لەگەڵ قەیس خەزعەلی کۆبووەوە و رایگەیاند، یەکێتی بەغدا بە قووڵایی ستراتیژیی خۆی دەزانێت و دەبێت کێشەکان بەپێی دەستوور چارەسەر بکرێن.
شەوی یەکشەممە 7-12-2025 شاندێکی باڵای یەکێتیی نیشتمانیی کوردستان لە بەغدا لەگەڵ قەیس خەزعەلی، ئەمینداری گشتیی بزووتنەوەی عەسائیب کۆبووەوە. لە کۆبوونەوەکەدا قوباد تاڵەبانی پیرۆزبایی سەرکەوتنی هەڵبژاردنی لە خەزعەلی کرد.
قوباد تاڵەبانی دید و بەرنامەی یەکێتی بۆ داهاتووی عێراق و پەیوەندییەکانی نێوان هەرێمی کوردستان و بەغدا روون کردەوە و رایگەیاند: "یەکێتی بەغدا بە قووڵایی ستراتیژیی خۆی دەزانێت و پێی وایە دەبێت هەموو کێشەکانی عێراق و لەنێویشیاندا کێشەکانی نێوان هەرێمی کوردستان و بەغدا، لەنێوخۆی عێراق و بەپێی دەستوور و لەسەر بنەمای رەچاوکردنی بەرژەوەندییە باڵاکانی هەموو عێراق چارەسەر بکرێن."
سەبارەت بە پێکهێنانی حکومەتی داهاتووی عێراقیش، قوباد تاڵەبانی رایگەیاند، عێراق پێویستی بە حکومەتێکی "بەهێز و کارا هەیە کە بتوانێت لەلایەکەوە سەروەری و سەربەخۆیی عێراق بپارێزێت و لەلایەکی دیکەشەوە هەنگاوی بنەڕەتی بنێت بۆ گەشەپێدانی ئابووریی عێراق.
لە کۆبوونەوەکەدا قوباد تاڵەبانی جەختی لەوە کردەوە، "خواست و سیاسەتی یەکێتی، عێراقێکی بەهێز و خاوەن ئابوورییەکی بەهێز و سەقامگیرە کە تێیدا کێشەکانی نێوان هەرێمی کوردستان و بەغدا بە بنەڕەتی چارەسەر کرابن، بەتایبەت بودجە و مووچە کە مافێکی دەستووریی هاووڵاتییانی کوردستانە".
قوباد تاڵەبانی گوتیشی: "ئەرکی حکومەتی داهاتووی عێراقە بەدوور لە ناکۆکییە سیاسییەکان، بەشە بودجە و مووچەی هەرێمی کوردستان دابین بکات."
