رووداو دیجیتاڵ
پەرلەمانتارێکی پارتی رایگەیاند، نەوزاد هادی، ئەندامی مەکتەبی سیاسیی پارتی، بۆ پۆستی سەرۆککۆماری عێراق بەربژێر کراوە.
شێروان دووبەردانی، پەرلەمانتاری فراکسیۆنی پارتی دیموکراتی کوردستان لە پەرلەمانی عێراق، رۆژی دووشەممە، 5-1-2026، بە تۆڕی میدیایی رووداوی راگەیاند، نەوزاد هادیش خۆی بۆ پۆستی سەرۆککۆماری عێراق بەربژێر کردووە.
بەگوتەی ئەو پەرلەمانتارەی پارتی، ئێستا پارتی بۆ ئەو پۆستە دوو بەربژێری هەیە، کە بریتین لە فوئاد حوسێن و نەوزاد هادی.
شێروان دووبەردانی ئاماژەی بەوەش کرد، کۆی گشتیی بەربژێرەکان بۆ پۆستی سەرۆککۆماری عێراق گەیشتووەتە 81 کەس و کاژێر 3:00ـی دوای نیوەڕۆ دەرگای خۆبەربژێرکردن داخرا.
نەوزاد هادی، ئەندامی مەکتەبی سیاسیی پارتی دیموکراتی کوردستان و بەرپرسی رێکخستنەکانی ئەو حیزبەیە لە نەینەوا و پارێزگاری پێشووتری هەولێر بووە.
