رووداو دیجیتاڵ
بەڕێوەبەرایەتیی گشتیی هاتووچۆی عێراق رایگەیاند، لە ماوەی سێ ساڵدا زیاتر لە چوار ملیۆن و 300 هەزار مۆڵەتی شۆفێرییان داوە و گرێبەستی کڕینی 100 راداری جێگیر و گەڕۆکیشیان بۆ چاودێریکردنی رێگەکانی دەرەوە کردووە.
ئەمڕۆ سێشەممە، 13-01-2026 لیوا عودەی سەمير، بەڕێوەبەری گشتیی هاتووچۆی عێراق، لە کۆنفرانسێکی رۆژنامەڤانیدا کە تۆڕی میدیایی رووداو ئامادەی بوو، رایگەیاند، "بەڕێوەبەرایەتیی هاتووچۆ لە ساڵانی 2023 و 2024 و 2025دا نزیکەی 4 ملیۆن و 326 هەزار و 479 مۆڵەتی شۆفێریی تۆمار کردووە." هەر لەو ماوەیەشدا 12 ملیۆن ئۆتۆمبێل تۆمار کراون.
بەڕێوەبەری گشتیی هاتووچۆی عێراق گوتی، تەنیا لە ساڵی 2025دا 488 هەزار و 102 مۆڵەتی شۆفێری دەرکراون و نزیکەی 76 هەزار و 198 جۆری ئۆتۆمبێلیش گۆڕدراون.
لیوا عودەی سەمير ئاماژەی بەوەش کرد، بۆ کەمکردنەوەی قەرەباڵخی 800 ماتۆڕسکیل بۆ هاتووچۆ دابینکراون و 17 ئۆتۆمبێلی تایبەت بە دەستنیشانکردنی ماددە کحولییەکان و کارتێکەرە هۆشییەکانیش بەسەر پارێزگاکاندا دابەشکراون.
سەبارەت بە رێکخستنی هاتووچۆ، لیوا عودەی سەمير گوتی، "گرێبەست بۆ کڕینی 100 راداری جێگیر و گەڕۆک کراوە بۆ چاودێریکردنی رێگە دەرەکییەکان، لە پارێزگای بەسرەوە تاوەکو نەینەوا." هەروەها دەست بە دانانی کامێرا و رووناککەرەوە لە 193 یەکتربڕ و رێگەی خێرا لە بەغدا کراوە.
بە گوتەی بەڕێوەبەری گشتیی هاتووچۆی عێراق، بۆ یەکەمجار لە کاتی هێڵکاریی شەقامەکاندا، شوێن بۆ خاوەن پێداویستییە تایبەتەکان دیاریکراوە و هێمای تایبەتیان بۆ دانراوە.
.jpg&w=3840&q=75)
.jpg&w=3840&q=75)