رووداو دیجیتاڵ
هێزە ئەمنییەکانی عێراق کەسێکیان بە پشتێنی بۆمبڕێژکراوەوە لە شاری رومادیی ناوەندی پارێزگای ئەنبار دەستگیرکرد. خاوەن چێشتخانەکە بە رووداوی گوت، ئەو کەسە ویستویەتی خۆی بتەقێنێتەوە.
رۆژی سێشەممە، 27ـی کانوونی دووەمی 2026، دەزگای ئاسایشی نیشتمانیی عێراق بڵاویکردەوە، لە ئۆپەراسیۆنێکی هەواڵگریی خێرا و ورددا، هێزەکانیان کەسێکی سەر بە رێکخراوی داعشیان دەستگیرکرد کە لە ناوچەی (5 کیلۆ) لە شاری رومادیی پارێزگای ئەنبار پشتێنێکی بۆمبڕێژکراوی بەستبوو و دەیویست "کاری تاوانکاری ئەنجام بدات".
هیوا عادل، خاوەنی چێشتخانەی (هیوا کوردی) لە روومادی ناوەندی ئەنبار بە رووداوی راگەیاند: "ئەو کەسە ویستی خۆی بتەقێنێتەوە و نزیکەی 50 مەتر لە چێشتخانەکەمەوە دووربوو، نەمانزانی ئەو کەسە بەنیازی خۆتەقاندنەوەیە تاوەکو هێزە ئەمنییەکان گەیشتنە شوێنەکە و دەستگیریان کرد."
هیوا عادل گوتیشی: "لە ساڵی هەشتاکانەوە لە ئەنبارم و شتی لەم جۆرەم نەبینیوە."
بەگوێرەی راگەیێندراوەکەی ئاسایشی نیشتمانیی عێراق، ئۆپەراسیۆنەکە دوای چاودێریی ورد و بەدواداچوونی جموجووڵەکانی ئەو "تیرۆریستە" هاتووە.
