رووداو دیجیتاڵ
لە ناحیەی تەقتەقی سنووری پارێزگای هەولێر، هێزە ئەمنیەکان 18 کەسیان بە تۆمەتی تیرۆر دەستگیرکرد؛ رووداو زانیویەتی هێزێک لە سلێمانییەوە چوون بۆ دەستگیرکردنیان.
ئەمڕۆ سێشەممە 23-05-2023 ئاسۆ مستەفا، بەڕێوەبەری ناحیەی تەقتەق بە تۆڕی میدیایی رووداوی گوت: "لە ناوەندی تەقتەق 18 هاونیشتمانیی بە تۆمەتی تێوەگلانیان بە تیرۆر و هەوڵدان بۆ کاری تیرۆریستی دەستگیرکراون."
ئاسۆ مستەفا گوتی "دەستگیرکردنی ئەو هاونیشتمانییانە بە فەرمانی دادوەر بووە و هێشتا دادگە تۆمەتەکانی بەسەردا ساخ نەکردوونەتەوە".
بە گوتەی بەڕێوەبەری ناحیەی تەقتەق تۆمەتبارەکان سەرجەمیان کوردن و دانیشتووی ناوەندی ناحیەکەن.
بەپێی زانیارییەکانی رووداو، ئەو تۆمەتبارانە لە رۆژانی یەکشەممە و دووشەممەی رابردوو لەلایەن هێزێکی ئەمنییەوە دەستگیرکراون کە لە سلێمانییەوە رەوانە کرابوون. رووداو ئەوەشی زانیوە کە دەستگیرکراوەکان "سەرجەمیان ئیسلامی یاخود سەلەفین."
