رووداو دیجیتاڵ
لە نزیک بانیخێڵان لەسەر رێگەی کەلار - دەربەندیخان، تەرمی هاووڵاتییەک لەنێو بارهەڵگرێکدا دۆزرایەوە. قایمقامی دەربەندیخان دەڵێت، کەسەکە عەرەبە و پێدەچێت دوو رۆژبێت گیانی لەدەستدابێت.
رۆژی شەممە 26ـی ئابی 2023، سلێمان محەممەد، قایمقامی قەزای دەربەندیخان بە تۆڕی میدیایی رووداوی گوت، "تەرمی هاووڵاتییەک لەنێو بارهەڵگرەکەیدا لەبەردەم چێشتخانەکانی بانیخێڵان دۆزراوەتەوە، کە ناوی محەممەد غافلە و لەدایکبووی 1962ـە و عەرەبە."
قایمقامی دەربەندیخان ئاماژەی بەوەکرد، کە تائێستا کەسوکاری ئەو قوربانییە بە رووداوەکەیان نەزانیوە. گوتیشی، "پێدەچێت دوو رۆژبێت مردبێت، ئەمڕۆ کارمەندی یەکێک لە چێشتخانەکان سەیری ئۆتۆمبێلەکەی کردووە و بینیویەتی کە شۆفێرەکەی تێدا مردووە."
بۆ زانینی هۆی مردنەکە، تەرمەکە رەوانەی دادپزیشکی کراوە. سلێمان محەممەد گوتی، "بەگوێرەی زانیارییە سەرەتاییەکان نەکوژراوە، بەڵام بۆ دڵنیابوونەوە دواتر دادپزیشکی روونی دەکاتەوە."
