رووداو دیجیتاڵ
لە باکووری کوردستان و تورکیا بەراورد لەگەڵ ساڵی رابردوو ژمارەی قوتابیان لە قوتابخانە سەرەتایی و ناوەندییەکان زیادیانکردووە و لە بەرامبەردا ژمارەی مامۆستایان کەمیانکردووە.
دەستەی ئاماری تورکیا لە چوارچێوەی "100 ساڵ ئامار" ژمارەی قوتابخانە و مامۆستایان و قوتابیانی بڵاوکردەوە. داتاکان دەریانخستووە، ژمارەی قوتابیان لە قوتابخانە بنەڕەتی و ناوەندییەکان زیادیکردووە، بەڵام سەرەڕای ئەوەی ئەم ساڵ 45 هەزار مامۆستا دامەزرێندراون، ژمارەی مامۆستایان کەمیکردووە.
بەگوێرەی داتاکان، لە ساڵی خوێندنی 2022-2023 لە باکووری کوردستان و تورکیا 18 هەزار و 936 قوتابخانەی ناوەندی هەبووە، بەڵام ئەم ژمارەیە لە ساڵی خوێندنی 2023-2024 بۆ 18 هەزار و 907 قوتابخانە کەمیکردووە.
لە قوتابخانە بنەڕەتییەکان، بەپێی ساڵی رابردوو، ژمارەی مامۆستایان لە 310 هەزار و 477 مامۆستاوە بۆ 299 هەزار و 967 مامۆستا کەمیکردووە. ژمارەی قوتابیان لە پێنج ملیۆن و 433 هەزار قوتابی بۆ پێنج ملیۆن و 535 هەزار قوتابی زیادیکردووە.
لە قوتابخانە ناوەندییەکان ژمارەی مامۆستایان بەراورد بە ساڵی رابردوو لە 376 هەزار و 747 مامۆستاوە بۆ 372 هەزار و 536 مامۆستا کەمیکردووە. ژمارەی قوتابیان لە پێنج ملیۆن و 293 هەزار قوتابی بۆ پێنج ملیۆن و 524 هەزار قوتابی زیادیکردووە، هەروەها ژمارەی قوتابخانە ناوەندییەکان لە 18 هەزار و 936 قوتابخانە بۆ 18 هەزار و 907 قوتابخانە کەمیکردووە.
.jpeg&w=3840&q=75)
