رووداو دیجیتاڵ
فەرماندەکانی پێشمەرگە و فەرماندە سەربازییەکانی عێراق لە سنووری قەرەهەنجیری پارێزگای کەرکووک، بۆ قسەکردن لەبارەی پاراستنی ناوەندەکانی دەنگدان و دابەشکردنی رۆڵی هێزەکانیان لە رۆژانی دەنگدانی ئەنجوومەنی پارێزگای کەرکووک، کۆبوونەوە.
عامر نووری، گوتەبێژی پۆلیسی پارێزگای کەرکووک، ئەمڕۆ (چوارشەممە، 13-12-2023) بە تۆڕی میدیایی رووداوی راگەیاند "فەرماندەی پۆلیسی کەرکووک، فەرماندەکانی سوپا، هێزی پێشمەرگە و ئاسایش رۆژی سێشەممە لەبارەی پاراستنی ناوەندەکانی دەنگدان کۆبوونەوە."
.jpg "دیمەنێکی کۆبوونەوەکە کە لەلایەن پۆلیسی پارێزگای کەرکووک بڵاوکراوەتەوە")
گوتەبێژی پۆلیسی پارێزگای کەرکووک گوتی، "هەر ناوەندێکی دەنگدان لە کەرکووک، سێ بازنەی ئەمنیی دەبێت، بازنەی یەکەم و دووەم هێزەکانی پۆلیسی کەرکووک دەبن، پاراستنی بازنەی سێیەم لە دوورەوە دەبێت و بەگوێرەی ناوچەکانی بەرپرسیاریەتییان دەکەوێتە ئەستۆی پۆلیسی فیدراڵی و سوپای عێراق، یاخود پێشمەرگە."
عامر نووری گوتی، "پێشمەرگە لە سنووری ناحیەکانی قەرەهەنجیر و شوان-ن، هەندێک ناوەندی دیکە سوپای عێراق و پێشمەرگە بە هاوبەشی دەبن. 16 ناوەندی دەنگدانیش هەن بە هاوبەشی دەبن لەگەڵ فەرماندەیی ئۆپەراسیۆنی نەینەوا و فەرماندەیی ئۆپەراسیۆنی سەلاحەدین."
.jpg "دیمەنێکی کۆبوونەوەکە کە لەلایەن پۆلیسی پارێزگای کەرکووک بڵاوکراوەتەوە")
گوتەبێژی پۆلیسی پارێزگای کەرکووک جەختی لەوە کردەوە، 80٪ـی پاراستنی ئاسایشی هەڵبژاردنی کەرکووک دەکەوێتە ئەستۆی پۆلیسی کەرکووک. لە دوێنێ سێشەممەوە هێزەکانی پۆلیس لە دەروبەری ناوەندەکانی دەنگدان بڵاوبوونەتەوە و ئەمڕۆش کەرەستەکانی هەڵبژاردن دەگەنە ناوەندەکانی دەنگدان، جگە لە کەرەستە هەستیارەکان کە ئێوارەی 16 مانگ دەگەن، رۆژی 17 مانگ دەنگدانی تایبەت و 18 مانگیش دەنگدانی گشتی بۆ هەڵبژاردنی ئەنجوومەنی پارێزگای کەرکووک بەڕێوەدەچێت.
رۆژی چوارشەممە، 01-11-2023، بانگەشەی هەڵبژاردنی ئەنجوومەنی پارێزگاکانی عێراق دەستیپێکرد. ئەنجوومەنی پارێزگای کەرکووک لە 15 کورسی و کورسییەکی کۆتای کریستیان پێکهاتووە، کورد تێیدا بە پێنج لیست بەشداری هەڵبژاردن دەکات.
.jpg "دیمەنێکی کۆبوونەوەکە کە لەلایەن پۆلیسی پارێزگای کەرکووک بڵاوکراوەتەوە")
پێشتر هەڵبژاردنی ئەنجوومەنی پارێزگاکان لە عێراق لە ساڵەکانی 2009 و 2013 کراوە، بەڵام لە ساڵی 2005ـەوە لە کەرکووک نەکراوە.
