رووداو دیجیتاڵ
کەشناسیی هەرێمی کوردستان رایگەیاند، لەم وەرزەی بارانباریدا تاوەکو ئەمڕۆ لە شاری هەولێر 396 ملیمەتر، لە سلێمانی 436 ملیمەتر، لە دهۆک 448.4 ملیمەتر، لە هەڵەبجە 517 ملیمەتر و لە کەرکووکیش 200 ملیمەتر باران باریوە.
لەبارەی کەشوهەواوە، لە راگەیێندراوەکەی ئەمڕۆدا کەشناسیی هەرێمی کوردستان دەڵێت، ئێوارەی ئەمڕۆ ئەگەری نمەبارانی کەمی پچڕپچڕ هەیە و بەفرێکی کەمیش لە ناوچە شاخاوییە سنوورییەکانی باکووری خۆرهەڵاتی هەرێمی کوردستان دەبارێت.
کەشناسیی هەرێمی کوردستان دەڵێت، سبەی بەیانیی لە هەندێک لە ناوچەکانی پارێزگاکانی هەولێر و دهۆک تەم دەبێت، دوای نیوەڕۆش نمەبارانێکی کەم لە ناوچەکانی رۆژئاوای هەرێمی کوردستان و پارێزگای دهۆک دەبارێت.
محەممەد کەمال، شارەزای کەشناسی ئەمڕۆ بە تۆڕی میدیایی رووداوی گوت، "ئەو شەپۆلە بارانبارینەی هەرێمی کوردستانی گرتەوە ئەمڕۆ دوایین رۆژیەتی و تاوەکو شەو ئەگەری بارانبارین لە سلێمانی و دەوروبەری هەیە.
محەممەد کەمال گوتی، سبەی پلەی گەرما دوو پلە بەرز دەبێتەوە و خێرایی با ئاسایی دەبێت. گوتیشی، "رۆژی سێشەممە شەپۆلێکی بارانی مامناوەند هەرێمی کوردستان دەگرێتەوە، لە رۆژی چوارشەممەوە کەشوهەوا خۆش و ئاسایی دەبێتەوە".
پلەی گەرمای شارەکان بۆ رۆژی دووشەممە:
هەولێر: 14 پلەی سیلیزی
سلێمانی: 12 پلەی سیلیزی
دهۆک: 16 پلەی سیلیزی
کەرکووک: 17 پلەی سیلیزی
هەڵەبجە: 13 پلەی سیلیزی
زاخۆ: 17 پلەی سیلیزی
سۆران: 9 پلەی سیلیزی
حاجی ئۆمەران: 4 پلەی سیلیزی
گەرمیان: 19 پلەی سیلیزی
.jpg&w=3840&q=75)