رووداو دیجیتاڵ
سەرۆکوەزیرانی عێراق رەزامەندیی دەربڕی قەرەبووی زیانلێکەوتووانی لافاوەکەی گوندەکانی قەرەتەپە بکرێتەوە. بەڕێوەبەری ناحیەکە دەڵێت، 160 ماڵ زیانیان بەرکەوتووە و قەرەبوو دەکرێنەوە.
ناحیەی قەرەتەپە سەر بە قەزای خانەقینە، دەکەوێتە ناوچە کوردستانییەکانی دەرەوەی ئیدارەی هەرێمی کوردستان. رۆژی 03-05-2024 لافاو گوندەکانی کەشۆڵی کۆن، سەلام، دۆرە و بەگال-ی گرتەوە، بەڵام زۆرترین زیان بەر کەشۆڵی کۆن کەوت.
رۆژی چوارشەممە 15-05-2024 وەسفی تەمیمی، بەڕێوەبەری ناحیەی قەرەتەپە بە رووداوی گوت، "تائێستا زیانلێکەوتووانی لافاوەکەی گوندەکانی قەرەتەپە قەرەبوو نەکراوەتەوە؛ تەنیا هەندێک هاوکارییان بەدەستگەیشتووە لەلایەن رێکخراوە حکومی و ناحکومییەکان، وەکو خۆراک و پێخەف و رایەخ."
بە گوتەی بەڕێوەبەری ناحیەی قەرەتەپە، "لافاو زیانی لە نزیکەی 160 ماڵ داوە، 60 ماڵیان زۆرترین زیانیان بەرکەوتووە و خانووەکانیان کە قوڕ بووە، رووخاون. ئەوانی دیکە 50% زیانیان بەرکەوتووە، 105 سەر مەڕ و شەش مانگا مرداربوون و چوار ئۆتۆمبێل ژێرئاو کەوتوون."
رۆژی 12-05-2024 ئەحمەد مەزهەر جبووری، جێگری سەرۆکی لیژنەی دارایی لە پەرلەمانی عێراق، کە هاوکات نوێنەری پارێزگای دیالەیە لە پەرلەمانی عێراق، نووسراوێکی بۆ محەممەد شیاع سوودانی، سەرۆکوەزیرانی عێراق کرد بۆ قەرەبووکردنەوەی زیانلێکەتووان و سەرۆکوەزیرانیش رەزامەندیی لەسەر قەرەبووکردنەوەیان دەربڕیوە.
بەڕێوەبەری ناحیەی قەرەتەپە گوتی، "سەرۆکوەزیرانی عێراق رەزامەندیی لەسەر قەرەبووکردنەوەیان داوە. زیانلێکەتووانیش لە نەتەوەی عەرەبن، هیچ ماڵێکی کورد و تورکمانی تێدا نییە. لیژنەیەکیش پێکدەهێندرێن زیانەکان دەخەمڵێنین و لەسەر بنەمای قەبارەی زیانەکان، خێزانەکان قەرەبوو دەکرێنەوە."
