رووداو دیجیتاڵ
وەزارەتی بەرگریی تورکیا گیانلەدەستدانی چوار گەریلای پارتی کرێکارانی کوردستان (پەکەکە)ی لە هەرێمی کوردستان راگەیاند. هەپەگەش دەڵێت، دوو سەربازی سوپای تورکیای کوشتووە و سەربازێکی دیکەشی بریندار کردووە.
ئەمڕۆ یەکشەممە، 14ـی تەممووزی 2024، وەزارەتی بەرگریی تورکیا لە راگەیێندراوێکدا گیانلەدەستدانی چوار گەریلای پەکەکە و دەستبەسەر داگرتنی بڕێک چەک و کەرەستەی دیکەی سەربازیی گەریلاکانی لە سنووری قەزای ئامێدی لە پارێزگای دهۆک راگەیاند.
وەزارەتی بەرگریی تورکیا گرتەیەکی ڤیدیۆیی بڵاوکردوەتەوە کە تێیدا هەندێک چەک دەبیندرێن کە گوایە وێنەی ئەو چەکانەن دەستیان بەسەردا گیراوە.
رۆژی 12ـی مانگ، ناوەندی چاپەمەنی و راگەیاندنی هێزەکانی پاراستنی گەل (هەپەگە) رایگەیاند، لەسەر رێگەیەکی سەرەکیی سنووری ئامێدی بۆسەیەکیان بۆ کاروانێکی سەربازیی سوپای تورکیا داناوە و لە ئەنجامدا دوو سەربازیان کوشتوون و سەربازێکی دیکەشیان بریندار کردووە.
ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ- قوفڵ و لە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.
بەڵام چەند هەفتەیەکە شەڕ و پێکدادانی نێوان هەردوو هێز لە سنووری ئامێدی زیاتر بووە.
