رووداو دیجیتاڵ
فەرماندەیی هێزەکانی پاراستنی گەل (هەپەگە) ناسنامهی دوو گەریلای پارتی کرێکارانی کوردستان (پەکەکە) ئاشكرا دهكات كه لە شهڕ و پێكدادان له دژی سوپای تورکیا لە خاکی هەرێمی کوردستان گیانیان لەدەستداوە.
ئەمڕۆ دووشەممە، 15ـی تەممووزی 2024، ناوەندی راگەیاندن و چاپهمهنیی هێزەکانی پاراستنی گەل (هەپەگە) ناسنامەی ئەو دوو گەریلایەی بڵاوکردەوە کە لە رۆژی 20ـی ئایاری 2024، لە ناوچەی مەتین لە هەرێمی کوردستان لە شەڕ و پێکدادان لە دژی سوپای تورکیا، لە چوارچێوەی ئۆپەراسیۆنی ناسراو بە چنگ – قوفڵدا گیانیان لەدەستدابوو.
ناسنامەی گەریلاکان بەمشێوەیەن: نیسان ئای، ناسراو بە یەکبوون شۆڕش، لەدایکبووی ئامەد. سێدات ئۆزەن، ناسراو بە رۆستەم هەمدەم، لەدایکبووی مووش.
هەر ئەمڕۆ، ناوەندی چاپەمەنی و راگەیاندنی هێزەکانی پاراستنی گەل (هەپەگە) کوژرانی چوار سەرباز و برینداربوونی دوو سەربازی دیکەی لە رۆژانی 12-14ـی مانگ لە ئەنجامی ژمارەیەک هێرشیان بۆ سەر هێزەکانی تورکیا لە ناوچەکانی حەفتانین، مەتین و زاپ لە خاکی هەرێمی کوردستان بڵاوکردەوە.
هەمان رۆژ، وەزارەتی بەرگریی تورکیا لە راگەیێندراوێکدا بە ئەمانجکردنی 14 گەریلای پەکەکە لە رێگەی فڕۆکە جەنگییەکانی ئێف 16 لە هەردوو ناوچەی مەتین و گارا لە خاکی هەرێمی کوردستان بڵاوکردەوە.
ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ- قوفڵ کە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.
