پشیلە بێلانەکانی بازاڕی شێخەڵڵای هەولێر 'لەگەڵ دووکاندارەکان هاوڕێن'

شاکر عەلی، دووکاندارێکی بازاڕی شێخەڵایە و چەند پشیلەیەک لە نزیک دووکانەکەی دەژین. شاکر بە رووداوی گوت: من زۆر یارمەتیی پشیلە دەدەم، ئەوان پاک و بێگەردن.

دووکاندارەکە بە چاوی پڕ لە بەزەییەوە سەیری پشیلەیەک دەکات و دەست بە پشتیدا دەهێنێت، دەڵێ "ئەم پشیلەیەیان لە تەمەنی دوو مانگییەوە لێرەیە، بێ من ناحەوێتەوە."

وەکو شاکر عەلی باسی دەکات، ئێستا لە بازاڕی شێخەڵڵا زۆربەی دووکاندارەکان یارمەتیی پشیلەکان دەدەن و ئاگاداریانن، رۆژانە خواردن و خواردنەوەیان بۆ دابین دەکەن و ناهێڵن ئازار بدرێن.

ئەمڕۆ (هەشتی ئاب) رۆژی جیهانیی پشیلەیە، کە لە ساڵی 2002ـوەوە لەلایەن سندووقی نێودەوڵەتی بۆ پاراستنی ئاژەڵان دەستنیشانکراوە، لەم رۆژەدا لە جیهان هۆشیاری لەبارەی پشیلە و رێگەکانی پاراستن و یارمەتیدانیان بڵاودەکرێتەوە. 

بەڵام ئەو دووکاندارانەی قسەیان بۆ رووداو کرد، باسی ئەوەیان کرد ئەوان زانیارییان لەبارەی رۆژی جیهانیی پشیلەوە نییە، لەگەڵ ئەوەشدا  هەموو رۆژێک بەبێ جیاوازی، یارمەتیی پشیلەکانی بازاڕەکەیان دەدەن.