رووداو دیجیتاڵ
پارتی یەکسانی و دیموکراسی گەلان-دەم پارتی بە دروشمی "قەییوم نادیموکراسییە" لە پێنج پارێزگای باکووری کوردستان گردبوونەوە، داواش لە خەڵک دەکەن بەشداریی گردبوونەوەکان بکەن.
نووسینگەی راگەیاندنی دەم پارتی لە راگەیێندراوێکدا دەڵێت، رۆژی هەینی، هەشتی تشرینی دووەمی 2024، بۆ ناڕەزایی دەربڕین دژی دانانی قەیووم لەسەر شارەوانییەکانیان لە پارێزگاکانی ئامەد، وان و، لە شارۆچکەکانی بازید سەر بە پارێزگای ئاگری، شارۆچکەی گەڤەر سەر بە پارێزگای جۆلەمێرگ و شارۆچکەی سلۆپی سەر بە پارێزگای شرنەخ گردبوونەوە دەکەن.
گردبوونەوەکەی ئامەد کاژێر 14:00 لە دەروازەی چیا دەستپێدەکات و تولای هاتیمۆغوڵڵاری هاوسەرۆکی دەم پارتی تێیدا بەشدار دەبێت.
کەسکین بایندر، هاوسەرۆکی پارتی هەرێمە دیموکراتییەکان-دەبەپە بەشداری لە گردبوونەوەکەی شارۆچكەی گەڤەر دەکات کە کاژێر 14:00 لەبەردەم بارەگای رێکخستنەکانی پارتەکەیان دەستپێدەکات.
سیری ساکک پەرلەمانتاری دەم پارتی لە بازنەی ئاگری بەشداری لە گردبوونەوەکەی شارۆچکەی بازید دەکات کە لە کاژێر 13:00 دەستپێدەکات.
گردبوونەوەکانی دەم پارتی لە شارۆچکەی گەڤەر کاژێر 13:00 و لە سلۆپی کاژێر 14:00 دەستپێدەکەن.
رۆژی چواری تشرینی دووەمی 2024 بە بڕیاری وەزارەتی ناوخۆی تورکیا، قەیووم بۆ شارەوانییەکانی مێردین، ئێلیهـ و خێلفەتی دانران. لەو رۆژەوە ناڕەزایەتی خەڵک و دەم پارتی دەستیپێکردووە و تائێستا بەردەوامە.
