رووداو دیجیتاڵ
بەڕێوەبەری گشتیی چاکسازییەکانی هەرێمی کوردستان رایگەیاند، دوای لێبووردنی تایبەتی سەرۆکی هەرێمی کوردستان بۆ 25 حوکمدراوی نەخۆش، سەرجەمیان لە چاکسازییەکان ئازاد کراون.
ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان رۆژی پێنجشەممە 14-11-2024 بە تۆڕی میدیایی رووداوی گوت: "دوێنێ بە لێبووردنی تایبەت 25 سزادراومان ئازاد کرد، کە سەرجەمیان خەڵکی نێوخۆی هەرێمی کوردستان بوون".
ئەوانەی ئازاد کراون لێبووردنی تایبەتیی نێچیرڤان بارزانی، سەرۆکی هەرێمی کوردستانیان هەبووە کە 13-10-2024 دەریکردووە. بەڕێوەبەری چاکسازییەکان دەڵێت: "ئازادکراوەکان هەموویان نەخۆشن؛ هەیانە شێرپەنجەی هەیە و تیاشیاندایە جەڵتەی دەماخ لێیداوە".
رۆژی شەممە 05-10-2024، کوێستان محەممەد، وەزیری کار و کاروباری کۆمەڵایەتیی هەرێمی کوردستان بە رووداوی راگەیاندبوو، لە چاکسازییەکاندا 100 کەس دەستنیشانکراون کە پەککەوتەن یان نەخۆشی شێرەنجەیان هەیە بۆ ئەوەی لێبووردنی تایبەتیان بۆ دەربکرێت.
بەگوێرەی ئاماری چاکسازییەکانی هەرێمی کوردستان بۆ رووداو، زیاتر لە 5700 حوکمدراو لە چاکسازییەکانن.
