کارکردن لە هەموو پڕۆژەکانی بەخێوکردنی ئاژەڵ لە سلێمانی راگیراوە

جەمال حوسێن، بەڕێوەبەری سامانی ئاژەڵ لە سلێمانی لەكاتی ‏‏بەشداریکردنی لە ‏‏پۆدكاستی (بەكاتی سلێمانی) كە ئاسۆ سەراوی پێشكێشی ‏دەكات ‏‏رایگەیاند، نرخی ئاژەڵی زیندوو کەمێک دابەزیوە، بەڵام ‏نرخی گۆشت بەو جۆرە دانەبەزیوە. "پێشتر نرخی بەرخ بە زیندە قەپان، كیلۆی تاوەكو 11هەزار دیناریش رۆیشتبوو، بەڵام ئێستا ‏8 هەزار‌و 500 دینارە، هەرچەندە نرخی ئەو جۆرە گۆشتە لە ‏‏24 هەزار دینارەوە بۆ 22 هەزار دینار دابەزیوە، بەڵام پێداچوونەوە ‌و ‏رێكخستنی نرخ بۆ ئەم قۆناخە پێویستە."

جەمال حوسێن گوتی: "لە هەندێ‌ شوێن نرخی ‏گۆشتی گوێرەكە بە 20 هەزار دینارە، هەندێ‌ شوێنیش هەیە نووسیویەتی ‏نرخی گۆشتی گوێرەكە بە 10 هەزار دینارە، ناكرێت هەریەك جۆر گۆشت ‏دوو نرخی بەو جۆرە جیاوازیان هەبێت، بۆیە دەبێت ئەم جۆرە نرخانە ‏یەك بخرێن ‌و بەرچاو روونیش بدرێتە كڕیاران."‏

بەڕێوەبەری سامانی ئاژەڵ لە سلێمانی ئەوەشی خستەڕوو، زیاتر لە دوو ‏مانگە لایەنە پەیوەندیدارەكانی چاودێری ‌و رێكخستنی نرخی گۆشت ‏كۆنەبوونەتەوە . "بەم نزیكانە كۆبوونەوەیەك بۆ ئەو مەبەستە دەکەین".‏

بەرپرسەكەی سامانی ئاژەڵ لە سلێمانی ئەوەشی خستەڕوو، "ئێستا ‏لە سلێمانی پێویستی نێوخۆیی لە گۆشتی سوور رۆژانە 90 تۆنە كە نیوەی گۆشتەکەی خۆماڵییە."

ئەوەی بۆ جەمال حوسێن مایەی نیگەرانییە ئەوەیە كە پڕۆژەكانی ‏بەخێوكردنی ئاژەڵی بچووك ‌و گەورە هیچ ‏بەرهەمێكیان نییە. "لە سلێمانی 23 پڕۆژەی بەخێوكردنی ئاژەڵمان هەبوو، كە 17یان ئاژەڵی گەورە ‌و شەشیان ئاژەڵی بچووكیان بەخێو دەکرد، بەڵام بە درێژایی ئەم ساڵ هیچیان یەك سەریشیان بەخێو نەکردووە."‏

بەڕێوەبەری سامانی ئاژەڵ لە سلێمانی ئاماژەی بەوەدا، لە پێناو هاوردەكردنی زۆرترین سەر ئاژەڵ بۆ سەربڕین ‌و دابەزاندنی ‏نرخی گۆشت، لە 11 مانگی رابردوودا مۆڵەتی هێنانی 135 هەزار سەر ‏ئاژەڵیان داوە.‏