رووداو دیجیتاڵ
لە رووداوێکدا لە قەزای کۆیە، هاونیشتمانییەک بە دەستی براکەی کوژرا، کە هەردووکیان ئەندامی هێزە ئەمنییەکانن.
رووداوەکە شەوی رابردوو لە قەزای کۆیە لە سنووری پارێزگای هەولێر روویداوە. بەگوێرەی زانیارییەکانی رووداو، تۆمەتباری رووداوەکە ئەفسەرە بە پلەی عەقید و فەرماندەی فەوجێکە لە سنوورەکە. هەروەها کوژراوەکەش پۆلیسی دارستانە، تەمەنی 36 ساڵە و دانیشتووی تەقتەقە.
عەمید عەلی عەبدوڵڵا، بەڕێوەبەری پۆلیسی کۆیە، وێڕای پشتڕاستکردنەوەی زانیارییەکانی رووداو، ئەمڕۆ دووشەممە 16-12-2024 بە تۆڕی میدیایی رووداوی گوت: "دۆسێی تۆمەتبارەکە لە ئاسایشە و بڕیارە سبەی رەوانەی پۆلیس بکرێت".
تاوەکو ئامادەکردنی ئەم هەواڵە، هێزە ئەمنییەکان هۆکاری رووداوەکەیان ئاشکرا نەکردووە.
