رووداو دیجیتاڵ
نرخی مریشکی زیندوو بەشێوەیەکی بەرچاو دابەزی و لە سلێمانی کیلۆی بە دوو هەزار و 100 دینار دەگاتە دەستی هاونیشتمانیان.
کاروان کاوە، مریشکفرۆش لە شاری سلێمانی ئەمڕۆ سێشەممە، 14-01-2024، بە تۆڕی میدیایی رووداوی گوت: "کیلۆیەک مریشک بە دوو هەزار و 100 دینار دەفرۆشین".
لە هەولێریش نرخی مریشک دابەزیوە. محەممەد عومەر، مریشکفرۆش لە گەڕەکی هەولێری نوێ ئەمڕۆ بە تۆڕی میدیایی رووداوی گوت: "نرخی کیلۆیەک مریشک دابەزیوە بۆ 2 هەزار و 300 دینار".
لە دوو مانگی رابردوودا کیلۆیەک مریشکی زیندوو لە هەرێمی کوردستان لە نێوان سێ بۆ سێ هەزار و 500 دیناردا بووە.
بەگوتەی کاروان کاوە، هۆکاری دابەزینی نرخی مریشک زۆری مریشکە لە کێڵگەکاندا. گوتیشی: "لە بەشێکی کێڵگەکان نەخۆشی لەنێو جووجکدا بڵاوە و خاوەن کێڵگەکان دەیانەوێت زووتر مریشکەکانیان بفرۆشن".
بەگوێرەی وەزارەتی کشتوکاڵ و سەرچاوەکانی ئاوی هەرێمی کوردستان، ساڵانە زیاتر لە 105 ملیۆن مریشک لە هەرێمی کوردستان گەورە دەکرێن کە بەرهەمەکەیان نزیکەی 250 هەزار تۆن گۆشتە، لەکاتێکدا پێداویستیی ساڵانەی گۆشتی مریشک لە نێوخۆدا 146 هەزار تۆنە. ئەوەی لە پێداویستیی نێوخۆ زیاترە هەناردەی پارێزگاکانی عێراق دەکرێت.
لە هەرێمی کوردستان خواستی زۆر لەسەر مریشکی زیندووە بەراورد بە بەستوو. هەزار و 840 پەلەوەرخانە لە هەرێمی کوردستان هەن، بەڵام بەشێوەی هەمیشەیی هەموویان بەرهەمیان نییە.
ژمارەی پەلەوەرخانەکان بەپێی پارێزگاکان:
- هەولێر: 576 پەلەوەرخانە
- سلێمانی: 727 پەلەوەرخانە
- دهۆک: 344 پەلەوەرخانە
- هەڵەبجە: 35 پەلەوەرخانە
