رووداو دیجیتاڵ
دوای ئەوەی شەوی رابردوو وەزارەتی کارەبای هەرێمی کوردستان رایگەیاند، "بۆ 10 کاژێر پەستانی گاز کەمبووەتەوە و 750 مێگاوات کارەبا بەو هۆیەوە کەمبووەتەوە"، بەڕێوەبەری کۆنترۆڵی کارەبای سلێمانی دەڵێ، دۆخی پەستان ئاسایی بووەتەوە و کارەباش بەرەو ئاساییبوونەوە دەڕوات.
ئەندازیار غالب محەممەد، بەڕێوەبەری کۆنترۆڵی کارەبای پارێزگای سلێمانی ئەمڕۆ شەممە بە تۆڕی میدیایی رووداوی گوت: "کێشەی پەستانی گاز ئەمڕۆ لە کۆمپانیای دانەگازەوە چارەسەرکرا و دۆخەکە ئاسایی بووەوە".
بەڕێوەبەری کۆنترۆڵی کارەبای سلێمانی کە سەرپەرشتی کۆنترۆڵی کارەبای هەڵەبجەشی لە ئەستۆدایە، ئاماژەی بەوەشکرد: "ئاساییبوونەوەی دۆخی کارەبا بۆ پێش کێشەی پەستانی گاز 24 کاژێری دیکەی پێویستە و سبەی دۆخەکە بە تەواوی ئاسایی دەبێتەوە".
غالب محەممەد ئاماژەی بەوەشكرد، ئێستا لە پارێزگاکانی سلێمانی و هەڵەبجە لە دۆخی ئاساییدا 6 بۆ 7 کاژێر کارەبا دەدەن، بەڵام دوێنێ لە 24 کاژێردا نزیکەی 4 کاژێر کارەبا دراوەتە ئەو دوو پارێزگایە؛ گوتیشی: "دۆخی هەولێر و دهۆک کەمێک لە ئێمە باشترە و نزیکەی یەک کاژێر کارەبا زیاتر دەدەن".
لە روونکردنەوەیەکدا کە درەنگی شەوی رابردوو بڵاویکردەوە، وەزارەتی کارەبای هەرێمی کوردستان رایگەیاند: "لە چوارچێوەی پەرەپێدانی كێڵگەی كۆرمۆر بۆ بەرهەمهێنانی گاز، بۆ ماوەی 10 کاژێر پەستانی غاز كەمبووەتەوە و بەهۆیەوە 750 مێگاوات كارەبا كەمبووەتەوە."
وەزارەتەکە ئاماژەی بەوەش کردووە: "بەهۆی هەندێک گرفتی تەكنیكییەوە کارەکان دواكەوتووە و بەپێی ئەو پلانەی كۆمپانیای دانەغاز دایناوە بڕیارە تاوەکو کاژێر (08:00)ی بەیانیی رۆژی شەممە دۆخەكە ئاسایی ببێتەوە."
هەر لە روونکردنەوەکەی وەزارەتی کارەبادا هاتووە: "تیمەكانی كۆنترۆڵی كارەبا بە هەماهەنگی لەگەڵ تیمەكانی بەرهەمهێنانی كارەبا بڕی 250 مێگاوات كارەبایان لە هەردوو وێستگەی دووکان و دەربەندیخان زیاد كردووە".
