رووداو دیجیتاڵ
ئێوارەی رۆژی دووشەممە، 3-2-2025، شاندێکی باڵای نەتەوە یەکگرتووەکان بە سەرۆکایەتیی محەممەد حەسان، نێردەی تایبەتیی سکرتێری گشتیی نەتەوە یەکگرتووەکان و سەرۆکی تیمی یۆنامی لە عێراق، لەگەڵ غولام ئیسحاق زای، جێگری نێردەی تایبەت و رێکخەری کاروباری مرۆیی لە عێراق، سەردانی تۆڕی میدیایی رووداویان کرد و لە لایەن ئاکۆ محەممەد، بەڕێوەبەری گشتیی تۆڕی میدیایی رووداوەوە پێشوازییان لێ کرا.
شاندی میوان باسیان لە پرسی دیموکراسی و رێزگرتن لە مافی مرۆڤ لە عێراق و رۆڵی راگەیاندن لەو بوارەدا کرد.
ئاکۆ محەممەد، بەڕێوەبەری گشتیی تۆڕی میدیایی رووداو سوپاسی هاتنی شاندەکەی کرد و ئاماژەی بەوەکرد، "تۆڕی میدیایی رووداو لەدەستپێکی وەشانییەوە، بێلایەنانە و پیشەییانە کاری کردووە و لەسەر ئەم رێچکەیە بەردەوام دەبێت".
لەنێو شاندەکەدا هەر یەک لە سەمیر غەتاس، گوتەبێژ و بەڕێوەبەری راگەیاندنی یۆنامی لە عێراق و مانۆج ماسیۆ، بەڕێوەبەری بەشی سیاسی لە یۆنامی و رەشوان ساڵح، بەرپرسی راگەیاندن لە نووسینگەی یۆنامی لە هەولێر هەبوون.