رووداو دیجیتاڵ
ئەو ئەفسەرە کوردەی کە بەرگری لە جووتیارانی گوندی شەناغەی سنووری سەرگەڕانی کەرکووک کرد، دوێنێ رەوانەی ماڵەوە کرا و دەگوازرێتەوە.
عەقید رێبەر مزووری، فەرماندەی فەوجی یەکی لیوای 32ی فیرقەی هەشتی سوپای عێراق، لەسەر بەرگریکردن لە جووتیارانی گوندی شەناغە سزا دراوە و لیژنەی لێکۆڵینەوەی لەسەر پێکهێنرا.
بەگوێرەی زانیارییەکانی تۆڕی میدیایی رووداو، دوێنێ لیژنەکەی فەرماندەیی ئۆپەراسیۆنەکانی کەرکووک چوونەتە دووبز، لەسەر رووداوەکە لێکۆڵینەوەیان لەگەڵ عەقید رێبەر مزووری کرد، دوای لێکۆڵینەوە رەوانەی ماڵەوەیان کردووە.
لیژنەکە بەو ئەفسەرە کوردەیان راگەیاندووە، "بڕۆ ماڵەوە، بڕیاری گواستنەوەت بۆ دەرەوەی لیوای هەشتی سوپای عێراقی دراوە و چاوەڕێ بکە تاوەکو بڕیارەکەت پێدەگات."
گوندی شەناغە، دەکەوێتە ناحیەی سەرگەڕان لە قەزای دووبزی سنووری پارێزگای کەرکووک.
عەقید رێبەر مزووری، لەسەر خراپ مامەڵەکردن لەگەڵ جووتیارانی کورد، فەرماندەی سریەی پشتیوانی سوپای عێراقی سزا داوە کە بەرپرس بووە لە گوندی شەناغە. فەرماندەیی ئۆپەراسیۆنەکانی کەرکووکیش لە بەرامبەردا سزای ئەو ئەفسەرە کوردەی داوە و بڕیاری گواستنەوەی دەرکردووە و لیژنەی لێکۆڵینەوەی لەسەر پێکهێنا.
رۆژی دووشەممەی رابردوو جووتیارانی کورد لە سنووری کەرکووک رۆژێکی پڕ لە زەحمەتی و رووبەڕووبوونەوەیان لەگەڵ سوپای عێراق بەڕێکرد، سوپا رێگری لێکردن زەوییەکانیان بکێڵن، بەڵام ئەوان کۆڵیان نەدا، گرژی دروستبوو و هەندێک لە ئەفسەر و سەربازەکان ئازاری جووتیارانیان دا.
رۆژی 21-01-2025 پڕۆژە یاسای گەڕاندنەوەی زەوی بۆ خاوەنەکانیان دەنگی لەسەر درا و بووە یاسا، بەڵام تاوەکو ئەمڕۆ رێکارەکانی ماون و نەچووەتە جێبەجێکردنەوە.
یاساکە تەنیا لە کەرکووک پەیوەندیی بە 300 هەزار دۆنم زەویی کورد و تورکمان هەیە. تایبەتە بە گەڕاندنەوەی موڵک و ماڵی ئەو کەسانەی کە بەگوێرەی هەشت بڕیاری ئەنجوومەنی سەرکردایەتیی شۆڕشی دەسەڵاتی پێشوو (بەعس) لێیان داگیرکرابوو.
.jpg&w=3840&q=75)
.jpg&w=3840&q=75)