وێنە؛ رۆژی سێیەم و کۆتایی کۆڕبەندی هەولێر

پرسی کورد و پرۆسەی ئاشتی خرایە سەر مێزی گفتوگۆ و ئۆغوز کان ساڵیجی، پەرلەمانتاری جەهەپە گوتی: ''جەهەپە بۆ پرسی کورد پارتێکی هەستیارە. پارتێکە پێیوایە، پرسی کورد هەیە و دەبێت بەشێوەی دیموکراسی چارەسەر بکرێت."

لە چاوپێکەوتنێکی تایبەت دا هەر لەبارەی پرسی کوردەوە لە رۆژی سێیەمی کۆڕبەندی هەولێر، سەڵاحەدین بەهائەدین، ئەمینداری گشتیی یەکگرتووی ئیسلامیی کوردستان رایگەیاند، ئەوان لە ساڵانی 1990ـەکانەوە لەگەڵ بەرپرسانی تورکیا لەسەر هێڵ بوون بۆ ئەو پرسە. کورد "میللەتێکی گەورەی ناوچەکەیە و پێویستە مافی هاووڵاتیبوونی هەبێت."

یەکێکی دیکە لە قسەکەرانی نێو کۆڕبەندەکە بولەنت ئارنج، سەرۆکی پێشووی پەرلەمانی تورکیا بوو و لەبارەی بانگەوازەکەی ئۆجەلانەوە رایگەیاند: پەیامی ئۆجەلان بۆ پەکەکە "فەرمانە و چاوەڕێی ئەنجامین."

لە کۆتایی پانێڵەکاندا، زریان رۆژهەڵاتی، بەرپرسی ناوەندی لێکۆڵینەوەی رووداو گوتاری کۆتایی کۆڕبەندەکەی پێشکێش کرد.

دواتر ئامادەبووان و رێکخەرانی کۆڕبەندەکە وێنەی یادگارییان چرکاند.