رووداو دیجیتاڵ
بەرگریی شارستانیی هەولێر دەڵێت، دوای نیوەڕۆی ئەمڕۆ منداڵێکی 7 ساڵان لەنێو پڕۆژەی ئاوی خەبات خنکا و تەرمەکەی دەرهێندرا.
رۆژی شەممە، 15ـی ئاداری 2025، شاخەوان سەعید، گوتەبێژی بەرگریی شارستانیی هەولێر بە تۆڕی میدیایی رووداوی راگەیاند، ئەو کەسەی خنکاوە کچێکی تەمەن 7 ساڵان بوو. رووداوەکە کاژێر 04:00ـی دوای نیوەڕۆی ئەمڕۆ بووە.
ئەو منداڵە ناوی نەرمين سەعد مەحموودە. گوتەبێژی بەرگریی شارستانیی هەولێر دەڵێت، "ماڵباتی ئەو کچە لەسەر پڕۆژەی ئاوی خەبات نیشتەجێن، نەعلی کچەکە کەوتبووە نێو ئاوەکە و ئەویش هەڵی داوە بیهێنێتەوە، بەڵام کەوتووەتە نێو ئاوەکە و خنکاوە."
شاخەوان سەعید دەڵێت، "عەسر کەوتبووە نێو ئاوەکە، پێش کاتی بانگی ئێوارە تيمی ژێرئاویی کەڵەك توانيیان تەرمەکەی بدۆزنەوە."
بە گوتەی شاخەوان سەعید، ئەو خێزانە کوردی شەبەکن و تەرمی منداڵەکەیان نێردراوە بۆ دادپزیشکی.
