رووداو دیجیتاڵ
وەزیری دارایی لەگەڵ بەڕێوەبەری بانکەکان و گەنجینەکانی سنووری پارێزگاکانی سلێمانی، هەڵەبجە و ئیدارەکانی گەرمیان و راپەڕین کۆبووەوە و پێی گوتن: "کەمتەرخەمی لە هیچ وەزارەتێک قبووڵ ناکەین".
کۆبوونەوەکە ئەمڕۆ سێشەممە، 18ـی ئاداری 2025 کرا. وەزارەتی دارایی لە راگەیێندراوێکدا دەڵێت، لە کۆبوونەوەکەدا ئاوات شێخ جەناب، وەزیری دارایی هەرێمی کوردستان باسی لە "کێشە و گرفتی هاووڵاتییان، فەرمانگەکان، بەڵێندەران و کۆمپانیاکان لەو سنوورە" کرد و جەختی "لە لابردنی سەرجەم ئاستەنگەکانی بەردەم بانکەکان کردەوە".
ئاوات شێخ جەناب لە کۆبوونەوەکەدا گوتوویەتی: "نابێت لە هیچ بانکێک کێشە و گرفت بۆ هاووڵاتییان، فەرمانگەکان و بەڵێندەران دروست بکرێت، بە پێچەوانەوە هەر کێشەیەکی نەخوازراو بەدەر لە یاسا و رێنماییەکان دروست بکرێت، رێکاری یاسایی پێویست لەگەڵ بەڕێوەبەری بانکەکان دەکرێت".
لە کۆبوونەوەکەدا وەزیری دارایی ئاماژەی بەوە کردووە "نابێت لە هیچ بانکێک دەستکاریی پارەی هاووڵاتییان ( ئەمانات، پارەدانان، دابینکردن و هتد) بکرێت، بە پێچەوانەوە رووبەڕووی لێپرسینەوەی یاسایی دەبنەوە".
لەبارەی پارەی مووچەش، وەزیری دارایی بە بەڕێوەبەری بانک و گەنجینەکانی گوتووە: "بە هیچ جۆرێک نابێت لە ژێر هیچ بیانوویەکدا پارەی تەرخانکراو بۆ مووچە بۆ هیچ بوارێکی دیکە بەکاربهێندرێت"، ئەوە بەگوێرەی راگەیێندراوەکەی وەزارەتی دارایی.
وەزارەتەکە لە بەشێکی دیکەی راگەیێندراوەکەدا، ئاماژەی بە قسەیەکی دیکەی وەزیری دارایی کردووە دەڵێت، وەزیر رایگەیاندووە، لە ئەگەری دووبارەبوونەوەی سەرپێچییەکان لەلایەن هەر کەس و لایەنێک، "داوا لە فەرمانبەران، مووچەخۆران و بەڵێندەران دەکەین راستەوخۆ وەزارەتمان ئاگادار بکەنەوە تاوەکو رێکاری پێویست بگرینەبەر".
لە کۆتایی کۆبوونەوەکەدا وەزیری دارایی گوتی: "لە نزیکەوە چاودێریی بەڕێوەچوونی کاروباری بانکەکان و جێبەجێکردنی بڕیارەکان دەکەین و کەمتەرخەمی و چاوپۆشی لە هیچ بانکێک قبووڵ ناکەین".
.jpeg&w=3840&q=75)
.jpg&w=3840&q=75)
