رووداو دیجیتاڵ
پارێزگاری کەرکووک دەڵێت، لە یەکەم رۆژی دوای پشووەکانی جەژن سەردانی بەغدا دەکەن و لەگەڵ سەرۆکوەزیرانی عێراق کۆدەبنەوە، گوتیشی، هەر لەدوای جەژن، بەردی بناخەی کۆمەڵێک پڕۆژەی لە پارێزگاکە دادەنرێن.
ئەمڕۆ دووشەممە 31-03-2025 لە کەرکووک و عێراق بە فەرمی یەکەم رۆژی جەژنی رەمەزان بوو. هەر یەکە لە رێبوار تەها، پارێزگار و محەممەد حافز، سەرۆکی ئەنجوومەنی پارێزگای کەرکووک و خالید شوانی، وەزیری دادی عێراق، کە کەرکووکییە لەگەڵ منداڵانی بێسەرپەرشت و بەساڵاچووانی پارێزگاکە نانی جەژنیان خوارد.
رێبوار تەها بە هەردی محەممەد، پەیامنێری تۆڕی میدیایی رووداوی راگەیاند، لەڕووی مرۆییەوە بە ئەرکی خۆیانیان زانی کە پێکەوە نانی جەژن لەگەڵ ئەو منداڵانەدا بخۆن.
بەگوتەی پارێزگاری کەرکووک، لەدوای جەژن، کۆمەڵێک پڕۆژەی نوێ لە پارێزگاکە رادەگەیێندرێن کە تاوەکو ئێستا بەردی بناخەیان دانەنراوە، لەوانەش، پڕۆژەکانی ریسایکلینی زبڵ و خاشاک، بەرهەمهێنانی کارەبا بە وزەی خۆر (سۆلار).
رێبوار تەها ئەوەشی خستەڕوو، لەدوای پشووەکانی جەژن و لە یەکەمین رۆژی کاریدا سەردانی بەغدا دەکەن.
پارێزگاری کەرکووک بەبێ ئاماژەدان بە وردەکاریی زیاتر گوتی، لە سەردانەکەیاندا، ''وەکو هەموو پارێزگاکانی دیکەی عێراق لە لیژنەی هاوئاهەنگی، کۆبوونەوەیەکمان لەگەڵ بەڕێز سەرۆکوەزیران دەبێت.''
