رووداو دیجیتاڵ
هاتووچۆی هەولێر دەڵێت، بەهۆی پڕۆژەیەکی ئاوەوە 10 رۆژ بەشێکی شەقامی 120 مەتری لە شارەکە دادەخرێت.
بەڕێوەبەرایەتیی هاتووچۆی هەولێر بڵاویکردەوە، لە ئەمڕۆوە بەهۆی کارکردن لە پڕۆژەیەکی ئاو، "شەقامی خزمەتگوزاری 120مەتری خێرا لە گەڕەکی 32ـی پارکەوە تاوەکو نزیک گۆڕەپانی پشکنینی ئۆتۆمبێلی بەڕێوەبەرایەتیی هاتووچۆی هەولێر دادەخرێت".
ئەندازیار هیوا عەبدولڕەزاق، بەڕێوەبەری پڕۆژەی ئاوی ئیفراز سێی هەولێر، ئەمڕۆ پێنجشەممە بە تۆڕی میدیایی رووداوی گوت: "داخستنی رێگەکە بەهۆی جێبەجێکردنی پڕۆژەی ئاوی فریاگوزاری هەولێرەوەیە، نەوەک پڕۆژەکانی ئیفراز".
داخستنی رێگەکە بۆ 10 رۆژ دەبێت. هاتووچۆی هەولێر داوا لە هاونیشتمانییان دەکات، شەقامە نزیکەکانی رێگە داخراوەکە بەکاربێنن تاوەکو کاری هەڵکەندن و گواستنەوەی بۆری ئاوە کە تەواو دەبێت.
پڕۆژەی فریاگوزاریی هەولێر لە 08-09-2024 لەلایەن مهسرور بارزانى، سهرۆكى حكومهتى ههرێمى كوردستانەوە بهردى بناخهى دانرا.
ئەندازیار هێمن نەزیف، سەرپەرشتیاری پڕۆژەی فریاگوزاریی ئاوی هەولێر، 24ـی ئادار بە تۆڕی میدیایی رووداوی راگەیاند: "تاوەکو ئێستا توانیومانە 70٪ـی کارەکانی پڕۆژەکە تەواو بکەین. بە تەواوبوونی پڕۆژەکە کێشەی کەمئاوی لە هەموو پارێزگای هەولێر بە تەواوی چارەسەر دەبێت".
پڕۆژەکە 480 هەزار مەتر سێجا ئاو بەرهەم دەهێنێت و تێچووەکەی 480 ملیۆن دۆلارە. بەگوتەی هێمن نەزیف، "بەشێکی پڕۆژەکە کۆتایی مانگی شەش تەواو دەبێت، دانیشتووانی سنووری شارەوانیی چوار، پێنج و شەش لێی سوودمەند دەبن، کۆتایی ئەم ساڵیش تەواوی پڕۆژەکە دەکەوێتە کار".
