رووداو دیجیتاڵ
بەڕێوەبەرایەتیی ئاسایشی ھەولێر رایگەیاند، لە گوندی دووسەرەی سەر بە ناحیەی شەمامک، دوای کوژرانی هاونیشتمانییەک، بکوژەکەی ویستوویەتی رابکات بۆ دەرەوەی هەولێر، بەڵام توانراوە لەلایەن هێزەکانیانەوە دەستگیر بکرێت.
رۆژی پێنجشەممە، 3ـی نیسانی 2025، بەڕێوەبەرایەتیی ئاسایشی ھەولێر لە راگەیەندراوێکدا بڵاویکردەوە: "بە فەرمانی دادوەری لێکۆڵینەوەی ئاسایشی ھەولێر تۆمەتبار (ھـ. م. م)ـمان دەستگیر کرد، کە لە گوندی دووسەرە سەر بە ناحیەی شەمامک لە پارێزگای ھەولێر، لەسەر کێشەیەکی کۆمەڵایەتی ھاووڵاتییەکی بە ناوی (ئیسماعیل عەزیز) کوشتووە."
لە راگەیێندراوەکەدا ھاتووە، "دوای تاوانەکە، تۆمەتبار بە نیاز بووە بڕواتە دەرەوەی شاری ھەولێر، بەڵام بەر لەوەی ھەڵبێت، لەلایەن ھێزەکانمانەوە دەستگیرکرا و دەستیشمان گرت بەسەر چەکێکی جۆری (دەمانچە) کە تاوانەکەی پێ کردبوو."
بەپێی زانیارییەکانی رووداو کە لە پۆلیس دەستی کەوتووە، "کوژراوەکە تەمەنی زیاتر لە 40 ساڵە و ناوی ئیسماعیل عەزیزە و دانیشتووی گوندی دووسەرەیە، بکوژیش تەمەنی 30 ساڵە و دانیشتووی ھەمان گوندە."
بەپێی زانیارییەکان، لێکۆڵینەوە لەسەر بابەتەکە بەردەوامە و بەپێی دەنگۆکان بێت، دەڵێن 'کێشەکە لەسەر سەگ بووە'، بەڵام ھێشتا روون نییە، چونکە لێکۆڵینەوە لەگەڵ بکوژ دەکرێت.
