رووداو دیجیتاڵ
دوێنێ بەیانی کچێک کەوتە نێو رووباری تەنگاتوور لە قەزای مێرگەسۆر، تاوەکو ئەمڕۆ تەرمەکەی بێسەروشوێنە. گوتەبێژی بەرگریی شارستانیی سۆران دەڵێت، "9 تیمی بەڕێوەبەرایەتییەکەمان و زیاتر لە 150 کارمەندی ئەمنی، بەردەوامن لە گەڕان بۆ دۆزینەوەی تەرمی ئاڤێستا."
ئەمڕۆ یەکشەممە، 6ـی نیسانی 2025، رەوەند مەغدید بە تۆڕی میدیایی رووداوی راگەیاند: "بە درێژایی ئەمڕۆ 9 تیمی بەڕێوەبەرایەتیی بەرگریی شارستانیی سۆران بە هاوکاریی زیاتر لە 150 ئەفسەر و کارمەندی پاسەوانی سنوور، ژینگە و فەرماندەی پێشمەرگەی بارزان بەردەوامن لە گەڕان، بەڵام تاوەکو ئێستا تەرمەکەی نەدۆزراوەتەوە."
وەکو گوتەبێژی بەرگریی شارستانیی سۆران دەڵێت: "بە ئەگەرێکی زۆر تاوەکو 10 بۆ 15 رۆژی دیکە بەهۆی بەرزیی ئاستی ئاوی رووبارەکە دۆزینەوەی تەرمەکە ئەستەم دەبێت، هەروەها سەختیی ناوچەکە و بارانی زۆر و لێڵی ئاوی رووبارەکە دۆزینەوەی تەرمی ئاڤێستای سەختتر کردووە."
رووداوەکە دوێنێ کاژێر 09:50 خولەکی بەیانی روویداوە. لەبارەی هۆکارەکەی، رەوەند مەغدید گوتی: "ئاڤێستا لەگەڵ براکەی بۆ وێنەگرتن چوونەتە کەناری رووبارەکە، بەڵام لەو کاتەدا براکەی دەکەوێتە ناو رووباری تەنگاتوور، ئەویش هەوڵی رزگارکردنی دەدات و رزگاری دەکات، بەڵام خۆی دەکەوێتە ناوی و دەخنکێت."
ئاڤێستا تەمەنی 27 ساڵە و دانیشتووی شاری هەولێرە، بۆ سەیران لەگەڵ خێزانەکەی چووبوونە بارزان، زیاتر لە 24 کاژێرە تەرمەکەی نەدۆزراوەتەوە.
