رووداو دیجیتاڵ
وەزیری کاروباری شەهیدان و ئەنفالکراوان دەڵێت، دواجار بەرهەمی هەوڵەکانیان چنییەوە. دەشڵێت، بەپارێزگاکردنی هەڵەبجە کاریگەریی بەرچاوی لەسەر بودجەی خەڵکی پارێزگاکە دەبێت.
رۆژی دووشەممە، 14ی نیسانی 2025، عەبدوڵڵا حاجی مەحموود، وەزیری کاروباری شەهیدان و ئەنفالکراوانی حکومەتی هەرێمی کوردستان، لە بارەی بە پارێزگاکردنی هەڵەبجە، بە تۆڕی میدیایی رووداوی راگەیاند، وەکو وەزارەتی شەهیدان و ئەنفالکراوان هەوڵی زۆریان دا و کۆبوونەوەی زۆریان کرد بۆ ئەو پرسە و گوتی: "ئەمە دەسکەوتێکی گەورەی مەعنەوی و سیاسییە بۆ تەواوی خەڵکی هەرێمی کوردستان و کەسوکاری شەهیدان و ئەنفالکراوان".
پرۆژەیاسای بە پارێزگاکردنی هەڵەبجە، چەند جارێک لە بەرنامەی کاری پەرلەمانی عێراق دادەنرا، بەڵام رێژەی یاسایی دانیشتنەکە تەواو نەدەکرا.
هەرچەندە لە دانیشتنی ئەمڕۆی پەرلەماندا پڕۆژەیاساکە پەسندکرا و هەڵەبجە بە فەرمی بووە پارێزگا، بەڵام عەبدوڵڵا حاجی مەحموود، پێیوایە لە داهاتوو کۆسپی زۆر بۆ ئەم بڕیارە دروست دەکەن و تانە لەو بڕیارە دەدەن، بەڵام دەڵێت: "دڵنیام بە هەوڵ و ئیرادەی کورد سەردەکەوین، پەرلەمانتاران رۆڵێکی گەورەیان هەبوو لە بە پارێزگاکردنی هەڵەبجە."
وەزیری کاروباری شەهیدان و ئەنفالکراوان باسی لەوە کرد، "بەپارێزگاکردنی هەڵەبجە کاریگەرییەکی باش و بەرچاوی لەسەر بودجە دەبێت بۆ خەڵکی هەڵەبجە، لە هەرێمی کوردستان هەموو رێکارە کارگێڕی و ئیدارییەکان بۆ بەپارێزگاکردنی هەڵەبجە تەواو کراوە، تەنیا ماوە لەڕووی جێبەجێکردنەوە لە عێراق رێکارە یاساییەکان تەواو بکرێن."
ئەمڕۆ دووشەممە 14-04-2025 پەرلەمانی عێراق کۆبووەوە، لە کۆبوونەوەکە دەنگ بە پرۆژەیاسای بەپارێزگاکردنی هەڵەبجە درا و هەڵەبجە بووە 19یەمین پارێزگای عێراق و چوارەمین پارێزگای هەرێمی کوردستان.
.webp&w=3840&q=75)