رووداو دیجیتاڵ
سەرۆکوەزیرانی هەرێمی کوردستان پێشوازی لە باڵیۆزی ئەڵمانیا لە عێراق کرد و هەردوولا "کۆک بوون لەسەر ئەوەی پێویستە کابینەیەکی بەهێز و یەکگرتوو لە نزیکترین کات و بەر لە هەڵبژاردنی ئەنجومەنی نوێنەرانی عێراق پێکبهێنرێت".
کۆبوونەوەکە ئەمڕۆ پێنجشەممە، 17-04-2025، کرا. مەسرور بارزانی و کریستیانە هۆمان، باسی پێکهێنانی حکومەت، هەناردەکردنەوەی نەوت، دۆخی عێراق و گۆڕانکارییەکانی ناوچەکەیان کرد.
بەگوێرەی راگەیێندراوێکی حکومەت، سەرۆکوەزیرانی هەرێمی کوردستان و باڵیۆزی ئەڵمانیا "جەختیان لە گرنگیی نەهێشتنی هەموو کێشە و ئاستەنگ و بیانووەکانی بەردەم دەستپێکردنەوەی هەناردەکردنی نەوتی هەرێمی کوردستان کرد".
وەکو لە راگەیێندراوەکەدا هاتووە: "باڵیۆزی ئەڵمانیا پشتیوانیی وڵاتەکەی بۆ هێزی پێشمەرگە و هەرێمی کوردستان و خواستی پەرەپێدانی زیاتری پەیوەندیی دوولایەنەی دووپات کردەوە".
حکومەت دەشڵێت، "لە بەشێکی دیکەی کۆبوونەوەدا، بیروڕا لەبارەی دۆخی گشتیی عێراق و دوایین گۆڕانکاری و پەرەسەندنەکانی ناوچەکە ئاڵوگۆڕ کرا".
.webp&w=3840&q=75)