رووداو دیجیتاڵ
تەندروستیی کەرکووک دەڵێت، مەترسیی بڵاوبوونەوەی تای خوێنبەربوون هەیە و ئەوەی کۆنترۆڵکردنەکەی سەخت کردووە، ئەوەیە نیشانەکانی لەسەر ئاژەڵان دەرناکەون.
تاوەکو ئێستا لە کەرکووک دوو کەس بە تای خوێنبەربوون گیانیان لەدەستداوە. هەڵمەتێکی فراوان بۆ قەدەخەکردنی سەربڕینی ئاژەڵ بە هەڕەمەکی، گۆشتی بێ مۆڵەت و بەخێوکردنی ئاژەڵ لە گەڕەکەکانی کەرکووک دەستی پێکردووە.
ئەمڕۆ شەممە، 19ـی نیسانی 2025، فەرمانگە پەیوەندیدارەکانی کەرکووک بۆ رێگری لە بڵاوبوونەوەی زیاتری نەخۆشییەکە و رێکارەکانیان، کۆنفرانسێکی رۆژنامەڤانیی هاوبەشیان بەست.
سەباح نامیق، بەڕێوەبەری بەشی تەندروستیی گشتی لە فەرمانگەی تەندروستیی کەرکووک رایگەیاند، لە سەرەتای ئەم ساڵەوە شەش گومانلێکراو لە شارەکە هەبوون، خرانە ژێرچاودێرییەوە و دوای پشکنین دەرکەوت چوار کەس تووشی نەخۆشییەکە بوون، دووانیان گیانیان لەدەستداوە و دووانەکەی دیکە چارەسەر وەردەگرن.
بەڕێوەبەری بەشی تەندروستیی گشتی لە فەرمانگەی تەندروستیی کەرکووک گوتی: "کێشەکە ئەوەیە نیشانەکانی نەخۆشییەکە لەسەر ئاژەڵان دەرناکەون، ئەمەش تاوەکو رادەیەک کۆنترۆڵکردنی نەخۆشییەکەی سەخت کردووە، تەنانەت ڤێتێرنەریش ناتوانێت ئاژەڵی نەخۆش یان تووشبوو دەستنیشان بکات."
تای خوێنبەربوون بە چەندین رێگەیەک دەگوازرێتەوە بۆ مرۆڤ، دەکرێت مرۆڤ بە سووکی تووشی بێت و لە زۆر باریشدا ببێتە هۆی گیانلەدەستدانی.
