هەژماری من دەخرێتە سەر وەزارەتی دارایی

رۆژی یەکشەممە، 20ـی نیسانی 2025، سەرۆکایەتیی دیوانی ئەنجوومەنی وەزیرانی هەرێمی کوردستان نووسراوێکی کردووە، کە واژۆی ئومێد سەباح ـی لەسەرە و تێیدا هاتووە، "لەسەر فەرمانی مەسرور بارزانی، سەرۆکی ئەنجوومەنی وەزیران، بڕیاردرا بە گواستنەوەی پرۆسەی بەبانککردنی مووچەی مووچەخۆرانی هەرێمی کوردستان (هەژماری من) بۆ سەر وەزارەتی دارایی و ئابووری."

لە راگەیێندراوەکەدا هاتووە، وەزارەتی دارایی و ئابووریی هەرێمی کوردستان سەرپشک دەبێت بۆ بەڕێوەبردنی پڕۆژەی (هەژماری من) لەبەر رۆشنایی یاسا و رێنماییە بەركارەکانی بانکی ناوەندیی فیدراڵی، هەژماری بانکیی مووچەخۆران پارێزراو دەبێت بەگوێرەی هەمان یاسا و رێنماییەکانی بانکی فیدراڵی.

وەک لە نووسراوەکەدا هاتووە، سەرجەم وەزارەت و لایەنە پەیوەندیدارەکان ئەم فەرمانە جێبەجێ دەکەن لە سەرتاسەری هەرێمی کوردستان و ئاسانکاریی پێویست پێشکێش دەکەن.

ئێستا 228,700 فەرمانبەری مەدەنی و 84,600 پێشمەرگە لە رێگەی بانکەکانی نێو پڕۆژەی هەژماری من مووچە وەردەگرن. پڕۆژەی (هەژماری من) پڕۆژەی حکومەتی هەرێمی کوردستانە بۆ بەبانکیکردنی مووچەی مووچەخۆران.