رووداو دیجیتاڵ
دوای ئازادکردنیان، دوو کوردی ئێزدیی رفێندراو گەڕێندرانەوە باشووری کوردستان و لەلایەن هێزەکانی سووریای دیموکرات - هەسەدەوە رادەستکرانەوە.
سەراب ئیلیاس، بەڕێوەبەری گشتیی کاروباری ژنانی ئێزدیی رزگاربووی دەستی داعش لە وەزارەتی کار و کاروباری کۆمەڵایەتیی عێراق، ئەمڕۆ یەکشەممە 27ی نیسانی 2025 بە تۆڕی میدیایی رووداوی راگەیاند، دوو گەنجی ئێزدی کە پێشتر لە منبج لەلایەن هێزەکانی سووریای دیموکرات ئازاد کرابوون، ئەمڕۆ بە فەرمی لە دەروازەی سنووری رەبیعەوە رادەستی هەواڵگریی عێراق کرانەوە.
دیار عەلی رەفۆ لە 23ی تشرینی یەکەمی 2024 و عوسمان خەیرۆ لە 12ین ئاداری ئەمساڵ ئازادکراوە
بەڕێوەبەری گشتیی کاروباری ژنانی ئێزدیی رزگاربووی دەستی داعش، کە لە پڕۆسەی رادەستکردنەوەکەدا لەسەر سنوور ئامادەبوو، گوتی، "دیار عەلی رەفۆ خەڵکی کۆچۆیە و لەدایکبووی ساڵی 2003یە، عوسمان خەیرۆ لەدایکبووی ساڵی 2006ـە و خەڵکی گوندی وەردییە لە گرعوزێر، ئەمانە ساڵی 2014 لەلایەن چەکدارانی داعشەوە رفێندرابوون."
دوو گەنجی کوردی ئێزدی کە لە ساڵی 2014 لەلایەن داعشەوە رفێندرابوون، لەلایەن هێزەکانی سووریای دیموکرات - هەسەدەوە رزگارکران و گەڕێندرانەوە بۆ باشووری کوردستان و نێو کەسوکاریان pic.twitter.com/5cCsmzFvNp
— Rudaw (@Rudawkurdish) April 27, 2025
سەراب ئیلیاس ئاماژەی بەوەش کرد، دیار ئێستا خێزانەکەی لە کەمپی قادیە لە پارێزگای دهۆک، عوسمانیش خێزانەکەی گەڕاونەتەوە شنگال، "بەداخەوە لە ئۆپەراسیۆن و بۆردوومانەکاندا دیار قاچێک و عوسمانیش دەستێکی قرتاوە. ئەمڕۆ هەردووکیان لە دەروازەی سنووریی رەبیعە رادەستی کەسوکارەکانیان کرانەوە.
"
بەگوێرەی نووسینگەی رزگارکردنی رفێندراوانی ئێزدی لە هەرێمی کوردستان، داعش لە ئابی 2014دا 6417 کوردی ئێزدیی رفاند، تاوەکو ئێستا لانیکەم 3585یان رزگار کراون.
