رووداو دیجیتاڵ
کۆنسووڵخانەی گشتیی بەریتانیا لە هەولێر، لەبارەی خۆهەڵوەشاندنەوەی پارتی کرێکارانی کوردستان - پەکەکە رایگەیاند، بە وردی چاودێریی پێشهاتەکان دەکەن، بڕیارەکەشی بە "هەنگاوێکی گرنگ" بەرەو ئاشتی و سەقامگیری بۆ خەڵکی تورکیا و ناوچەکە ناوبرد.
رۆژی چوارشەممە 14ی ئایاری 2025 رۆنزا ئەسکەر، بەرپرسی راگەیانی کۆنسووڵخانەی گشتیی بەریتانیا لە هەولێر، لەبارەی بڕیاری خۆهەڵوەشاندنەوەی پەکەکە، بە تۆڕی میدیایی رووداوی گوت، "بەریتانیا بەردەوامە لەوەی بە وردی چاودێریی ئەو پێشهاتانە بکات."
کۆنسووڵخانەی بەریتانیا لە هەولێر دەشڵێت، "بڕیاری پەکەکە بۆ چەکدانان و خۆهەڵوەشاندنەوە هەنگاوێکی گرنگە بەرەو ئاشتی و سەقامگیری بۆ خەڵکی تورکیا و ناوچەکە بەگشتی."
هەروەها کۆنسووڵخانەی بەریتانیا پابەندیی خۆی بۆ پاڵپشتیکردنی "ئەو هەوڵانەی کە ململانێکان کەم دەکەنەوە و دەبنە هۆی سەقامگیری زیاتر،" دووپاتکردەوە.
رۆژی 27ی شوباتی 2025 عەبدوڵڵا ئۆجەلان، رێبەری پارتی کرێکارانی کوردستان- پەکەکە لە رێگەی شاندی دەم پارتی- ئیمڕاڵی بانگەوازێکی بڵاوکردەوە و داوای لە پەکەکە کرد کە چەکەکانیان دابنێن و خۆیان هەڵبوەشێننەوە.
لەسەر داواکاری ئۆجەلان لە رۆژانی 5- 7 ئایاری 2025 لە دوو شوێنی جیاواز پەکەکە 12یەمین کۆنگرەی خۆی بەست و راگەیاند، هیچ چالاکییەک بەناوی پەکەکەوە ناکرێت و کۆتایی بە خەباتی چەکداری دێنن و خۆیان هەڵدەوەشێننەوە.
