رووداو دیجیتاڵ
دەزگای ئاسایشی هەرێم رایگەیاند، باندێکیان بە تۆمەتی بازرگانیکردن بە جەستەی مرۆڤ دەستگیرکردووە کە "خەڵکیان فریوداوە بە فرۆشتنی گورچیلە."
رۆژی چوارشەممە، دەزگای ئاسایشی هەرێم راگەیێندراوێکی بڵاوکردەوە رایگەیاند، لە شاری سلێمانی باندێکی چوار کەسییان دەستگیرکردووە کە بە تۆمەتی فریودانی هاووڵاتیان و "بازرگانیکردن بە گورچیلەوە، بڕی 32 ملیۆن دیناریان لە پێنج خێزان وەرگرتووە."
بە گوێرەی راگەیێندراوێکی دەزگای ئاسایشی هەرێم "بەڕێوەبەرایەتیی لێکۆڵینەوەی دەزگای ئاسایشی هەرێم بە هەماهەنگی لەگەڵ بەڕێوەبەرایەتی ئاسایشی پارێزگای سلێمانی، باندێکیان دەستگیرکرد کە خەڵکیان فریوداوە بە فرۆشتنی گورچیلە."
ئۆپەراسیۆنەکەی ئاسایش دوای ئەوە هات کە چەند هاووڵاتییەک سکاڵایان تۆمارکردبوو. لە راگەیێندراوەکە ئاماژە بەوەشکراوە، "لەسەر سکاڵای هاووڵاتییان و بەبڕیاری دادوەری لێکۆڵینەوەی ئاسایش، بەڕێوەبەرایەتیی لێکۆڵینەوەی دەزگای ئاسایشی هەرێم، بەدواداچوونی وردی ئەنجامدا."
دەزگای ئاسایشی هەرێم دەڵێت، "لە رۆژانی 7 و 8ـی ئایاری 2025، توانرا لە شاری سلێمانی باندێکی چوار کەسی دەستگیربکرێن کە بڕی 32 ملیۆن دیناریان لە پێنج خێزان وەرگرتووە و فریویان داون بەوەی گورچیلە لەبەرامبەر بڕێک پارەدا دەفرۆشن."
لە کۆتایی راگەیێندراوەکەدا هاتووە: "لە ئێستادا تۆمەتباران بەپێی ماددەی 456 لە یاسای سزادانی عێراقی راگیراون و لێکۆڵینەوە لە دۆسیەکانیان بەردەوامە."
