رووداو دیجیتاڵ
بەڕێوەبەرانی پسوولەی خۆراکی پارێزگاکان دەڵێن، بە ئەگەرێکی زۆرەوە ماوەی پڕکردنەوەی فۆڕمی خۆراک زیاتر لە 10 رۆژی دیکە درێژ دەکرێتەوە. باسیان لەوەش دەکەن، "لە هەرێمی کوردستان زیاتر لە 350 کەس بەهۆی نەشتەرگەریی جوانکاری، ریش و کێشەی خێزانی ناتوانن فۆڕمی خۆراک پڕبکەنەوە، چونکە شێوەی دەموچاویان ناناسرێتەوە."
رۆژی سێشەممە، 24ـی حوزەیرانی 2025، سیامەند قادر نانەکەلی، بەڕێوەبەری پسوولەی خۆراکی هەولێر بە تۆڕی میدیایی رووداوی راگەیاند: "لە سەرەتای مانگی حوزەیرانەوە لە ملیۆنێک و 900 هەزار کەس، 800 هەزار کەس ماون فۆڕمی خۆراک پڕ بکەنەوە، واتە 58٪ پڕیان کردووەتەوە."
سیامەند قادر دەڵێت، کۆمەڵێک کێشەیان بۆ دروستبووە، "بەشێکی زۆری خەڵک بەهۆی نەشتەرگەری جوانکاری، ریش، کێشەی خێزانی، هەروەها کەسانی خاوەن پێداویستی تایبەت و کەسانی بەتەمەن نەیانتوانیووە فۆڕمی خۆراک پڕبکەنەوە کە ژمارەیان نزیکەی 100 کەس دەبێت."
بەڕێوەبەری پسوولەی خۆراکی هەولێر گوتیشی: فۆڕمی هەریەکە لە کێشە خێزانییەکان، کەسانی خاوەن پێداویستی تایبەت و کەسانی بەتەمەن جیان، بۆ ئەوەی تێکەڵی فۆڕمەکانی دیکە نەبن، "ئەوانەی کێشەیان هەبێت دەیاننێرین بۆ بەغدا تاوەکو چارەسەریان بکەن."
خۆراکی هەڵەبجە: 75٪ـی هاونیشتمانیان فۆڕمیان پڕکردووەتەوە
مەریوان هادی، بەڕێوەبەری بەشەخۆراکی هەڵەبجە بە رووداوی گوت: "75٪ـی هاونیشتمانیان فۆڕمیان پڕکردووەتەوە، بەڵام 100 کەس بەهۆی کێشەی خێزانی (جیابوونەوە)، نەشتەرگەری جوانکاری، منداڵان و خاوەن پێداویستی تایبەت نەیانتوانیوە فۆڕمەکانیان پڕ بکەنەوە."
5ـی تەممووز، دوایین وادەیە بۆ پڕکردنەوەی فۆڕمی خۆراک. مەریوان هادی گوتی: "بە ئەگەرێکی زۆر نزیکەی 15 بۆ 20 رۆژ درێژ دەکرێتەوە، چونکە بەشێکی زۆر ماون بێن بۆ مامەڵە."
'لە سلێمانی پڕۆسەکە بە سستی بەڕێوەدەچێت'
ئاراس محەممەد، بەڕێوەبەری پسوولەی خۆراکی سلێمانی بۆ رووداو دەڵێت: "لە کۆی ملیۆنێک و 900 هەزار کەس، زیاتر لە 900 هەزار کەس فۆڕمیان پڕکردووەتەوە، کە ئەم رێژەیە بۆ سلێمانی کەمە و پڕۆسەکە سستە، داوا لە هاووڵاتیان دەکەین بە زووترین کات بێن بۆ پڕکردنەوەی فۆڕمەکانیان، بە پێچەوانەوە بەشە خۆراکی مانگانەیان دەبڕێت."
وەک ئاراس محەممەد دەڵێت: لە سلێمانی زیاتر لە 100 کەس فۆڕمەکانیان پڕ نەکردووەتەوە، چونکە کێشەیان بۆ دروستبووە. "لیستێک دروستدەکرێت و ناوەکانیان بۆ بەغدا دەنێردرێت."
گوتیشی: "هێشتا خەڵکێکی زۆر ماون، بۆیە بە ئەگەرێکی زۆر کاتەکەی درێژدەکرێتەوە."
'لە دهۆک 720 خێزانی سەرمایەدار رەتیانکردووەتەوە فۆڕم پڕبکەنەوە'.
حوسێن سەبری، بەڕێوەبەری رێکخستنی پسوولەی خۆراکی دهۆک بە رووداوی گوت: "لەسەرەتای مانگی شەش ئەم سیستەمە کاراکر، لەدوای پلانی بەغدا 5ـی تەممووز دواین وادەیە، بەڵام زیاتر لە 10 رۆژ درێژدەکرێتەوە، لە دهۆک لە ملیۆنێک و 300 کەس نیوەیان فۆڕمیان پڕکردووەتەوە."
لەبارەی ئەو کەسانەی نەیانتوانیوە فۆڕم پڕبکەنەوە، بەڕێوەبەری رێکخستنی پسوولەی خۆراکی دهۆک گوتی: "زیاتر لە 50 کەسن". دەشڵێت: "720 خێزانی سەرمایەدار مانگانە نایەن بۆ وەرگرتنی بەشە خۆراکەکانیان و رەتیانکردووەتەوە فۆڕم پڕبکەنەوە، بەڵام ئێمە داوایان لێدەکەین پڕیبکەنەوە."
29ـی ئەم مانگە، فۆرمی ئەلیکترۆنیی خۆراک لە هەرێمی کوردستان بە شێوەی ئەزموونی کارا کرا، سەرەتای مانگی حوزەیران بە شێوەی فەرمی کارا کرا. ماوەی مانگێک دیاریکراوە بۆ نوێکردنەوە و تۆمارکردنی هەموو خێزانەکان لەو فۆڕمەدا، ئەویش لە رێگەی ئەپلیکەیشنێکی مۆبایلەوەیە کە بە زمانەکانی کوردی و عەرەبی بەردەستە.
بە ئەلیکترۆنیکردنی پسوولەی خۆراک سوودی چییە؟
کۆبۆنی ئێستای خۆراک دەگەڕێتەوە بۆ ساڵی 1996، دوای چالاککردنی ئەو ئەپڵیکەیشنە گۆڕانکاری لە کۆبوون و ئاسانکاری بۆ هاووڵاتییان دەکرێت، چونکە دوای جێبەجێکردنی ئەم بڕیارە، هاتووچۆکردن بۆ فەرمانگەکان و لای بریکارەکان نامێنێت، هاووڵاتییان هەر لە مۆبایلەکانیان دەتوانن داوای گواستنەوەی بەشەخۆراک و زیادکردنی منداڵی تازە لەدایکبوو بکەن."
لە سنووری سلێمانی و هەڵەبجە دوو ملیۆن و 74 هەزار و 129 کەس مانگانە لەڕێگەی فۆرمی خۆراکەوە بەشەخۆراک وەردەگرن؛ لە پارێزگای هەولێر زیاتر لە ملیۆنێک و 960 هەزار کەس و لە پارێزگای دهۆکیش زیاتر لە ملیۆنێک و 320 هەزار کەس.
