رووداو دیجیتاڵ
شانەی راگەیاندنی ئەمنیی عێراق، وردەکاریی ئەو ئۆپەراسیۆنە ئەمنییەی شەوی رابردووی بڵاوکردەوە، کە دەزگای دژەتیرۆری عێراق، لە دژی چەکدارانی رێکخراوی داعش لە پارێزگای کەرکوک ئەنجامی دا و یەکێک لە کوژراوەکان والی ریازە.
بە گوێرەی راگەیێندراوی شانەکە، کە بەرەبەیانی رۆژی پێنجشەممە، 26ی حوزەیرانی 2025 بڵاویکردەوە لە بۆسەیەکی تۆکمەدا، کە چوار رۆژی خایاند، دوای بەدواداچوون و لێکۆڵینەوەی ورد، هێزەکانی دەزگای دژەتیرۆر لە سنووری کەرکووک لە دۆڵی زغێتوون دوو چەکداری داعش-یان کوشت.
دۆڵى زغێتوون دەکەوێتە رۆژهەڵاتى قەزاى حەویجەى لە باشوورى رۆژئاواى کەرکووک.
بە گوێرەی راگەیێندراوی شانەی راگەیاندنی ئەمنی، یەکێکیان والی ریاز و ئەوی دیکەیان بەرپرسی سەربازیی ریاز بووە. هێزەکەش دەستیان بەسەر چەک و کەلوپەل و هەندێک کەرەستەی تەکنیکی و ئامێر و بەڵگەی تاوانکارییاندا گرتووە.
رۆژی 25ـی حوزەیرانى 2025، دەزگای دژە تیرۆری عێراق راگەیێنراوێکى لە بارەى ئۆپراسیۆنێکیان بڵاوکردەوە و گوتی: "هێزەکانمان لە بۆسەیەکی تۆکمەدا لە دۆڵی زغێتوون دوو تیرۆریستی داعشیان کوشتووە".
10ـی حوزەیرانى 2025، سوپاى عێراق کۆنترۆڵکردنى دۆڵى زغێتوونی راگەیاند، کە پێشتر چەکدارانى رێکخراوى داعش چالاکى و جموجۆڵیان تێیدا هەبوو و کردبوویانە مۆڵگەى خۆیان.
.webp&w=3840&q=75)