رووداو دیجیتاڵ
وەلید فارس، راوێژکاری پێشووی دۆناڵد ترەمپ، سەرۆکی ئەمریکا، پێشنیازی واژۆکردنی "رێککەوتنێکی بەرگریی هاوبەش" دەکات لەنێوان هەرێمی کوردستان و هێزەکانی سووریای دیموکرات (هەسەدە)، بۆ رووبەڕووبوونەوەی هەڕەشەی میلیشیاکان.
وەلید فارس، رۆژی یەکشەممە 6ـی تەممووزی 2025، لە ئێکس نووسی: "پێویستە هێزەکانی سووریای دیموکرات لە سووریا و حکومەتی هەرێمی کوردستان لە عێراق، دژی هەڕەشەی میلیشیا جیهادییەکان لە سنوورە نێودەوڵەتییەکاندا، رێککەوتنێکی بەرگریی هاوبەش واژۆ بکەن."
فارس لە بەشێکی دیکەی تویتەکەیدا ئاماژەی بە رێککەوتننامەی سایکس-پیکۆ کردووە و دەڵێت: "مادام هەندێک کەس کار بۆ سڕینەوەی سایکس-پیکۆ دەکەن، باشە، با پێداچوونەوەکە لەژێر یاسای نێودەوڵەتی و پەیماننامەی نەتەوە یەکگرتووەکاندا دەستپێبکات."
راوێژکارەکەی پێشووی ترەمپ، لە تویتەکەیدا هەریەک لە مەسرور بارزانی، سەرۆکوەزیرانی هەرێمی کوردستان و مەزڵووم عەبدی، فەرماندەی گشتیی هێزەکانی سووریای دیموکرات، لەگەڵ ژمارەیەک سیناتۆر و بەرپرسی ئەمریکی تاگ کردووە، لەوانەش وەزارەتی بەرگریی ئەمریکا و سەرۆکی ئەنجوومەنی نوێنەران.
وەلید فارس، شرۆڤەکارێکی سیاسیی لوبنانی-ئەمریکییە و لە هەڵمەتی هەڵبژاردنی 2016دا راوێژکاری دۆناڵد ترەمپ بووە. ئەو بە شرۆڤەکانی لەسەر پرسەکانی رۆژهەڵاتی نێوەڕاست و دژە تیرۆر ناسراوە.
.jpg&w=3840&q=75)
.jpg&w=3840&q=75)