رووداو دیجیتاڵ
بەڕێوەبەرایەتیی خۆسەر لە راگەیێندراوێکدا کۆبوونەوەکانی ئەم دواییە لەگەڵ حکومەتی سووریا بە "چارەنووسساز" و "دەستکەوتی سیاسی و مێژوویی" ناودەبات؛ ئاماژە بەوەش دەکات: "داوای دەستوورێک دەکەین کە مافی هەموو پێکهاتەکان مسۆگەر بکات".
لە راگەیێندراوەکەدا کە رۆژی یەکشەممە 13ی تەمموزی 2025 بڵاوکرایەوە، بەڕێوەبەرایەتیی خۆسەر سوپاسی ئەمریکا و فەرەنسا دەکات بۆ رۆڵیان لە نێوەندگیری و پشتیوانیکردنیان لە سەقامگیریی سووریا.
بەڕێوەبەرایەتیی خۆسەر دەڵێت: "دوای ساڵانێک لە ململانێ و دابڕان، دانیشتنی هێزە سووریاییەکان لەسەر مێزێک بۆ گفتوگۆکردن لەسەر پرسە چارەنووسسازەکان بە شێوەیەکی جیدی و شەفاف، دەستکەوتێکی سیاسی و مێژووییە."
لەبارەی دیدگەی خۆیەوە بۆ داهاتووی سووریا، لە راگەیێنراوەکەدا هاتووە: "بە روونی و بێ هیچ دوودڵییەک رایدەگەیەنین کە یەکپارچەیی خاکی سووریا بنەمایەکی سازش هەڵنەگرە"؛ هەروەها داواکارییەکانی بۆ "سیستمێکی دیموکراسیی فرەیی، دادپەروەریی کۆمەڵایەتی، یەکسانیی جێندەری و دەستوورێک کە مافی هەموو پێکهاتەکان مسۆگەر بکات" وەک "کرۆکی" داواکارییەکانی خەڵکی سووریا لە ساڵی 2011ـەوە ناوبردووە.
بەڕێوەبەرایەتیی خۆسەر ئاماژەی بەوەش کردووە، ئاواتەخوازن "لە بنیاتنانی سووریایەکی نوێدا ببنە هاوبەشی کارا، سووریایەکی ناناوەندی کە هەموو رۆڵەکانی لە باوەش دەگرێت".
لە کۆتاییدا، بەڕێوەبەرایەتیی خۆسەر دەڵێ: "بەشداریکردن لە پرۆسەی سیاسیدا بژاردەی ستراتیژیی ئێمەیە" و ئامادەیی تەواوی خۆیان بۆ "تێکەڵبوون لەگەڵ دامەزراوەکانی دەوڵەت لەسەر بنەمای دیموکراسی" دەربڕی.
دەقی راگەیێندراوەکە:
بۆ رای گشتی
کۆبوونەوەکانی ئەم دواییەی نێوان شاندی بەڕێوەبەرایەتیی خۆسەری باکوور و رۆژهەڵاتی سووریا و حکومەتی سووریا، بە ئامادەبوونی نوێنەرانی حکومەتەکانی ئەمریکا و فەرەنسا، هەنگاوێکی چارەنووسساز پێکدەهێنێت بەرەو دەستپێکردنی پرۆسەیەکی جیدیی دیالۆگی سووری-سووری؛ پرۆسەیەک کە لە سەرەتای شۆڕشی سووریاوە ماوەیەکی زۆرە هەوڵی بۆ دەدەین.
لەم چوارچێوەیەدا، بە گەرمیی سوپاسی هەریەک لە ویلایەتە یەکگرتووەکانی ئەمریکا و کۆماری فەرەنسا دەکەین بۆ رۆڵی بنیاتنەرانەیان و هەوڵە بەردەوامەکانیان بۆ پشتیوانیکردن لە سەقامگیری، ئاشتی و دیموکراسی لە سووریا.
دوای ساڵانێک لە ململانێ و دابڕان، دانیشتنی هێزە سووریاییەکان لەسەر مێزێک بۆ گفتوگۆکردن لەسەر پرسە چارەنووسسازەکان بە شێوەیەکی جیدی و شەفاف، دەستکەوتێکی سیاسی و مێژووییە. گەڕاندنەوەی متمانە لەنێوان لایەنە کاراکانی سووریادا بووەتە پێویستییەکی نیشتمانی، تەنیا لە رێگەی دیالۆگی بەرپرسیارانەوە دەتوانرێت بەسەریدا زاڵ بین.
کاتی ئەوە هاتووە ئەو گوتارە تێپەڕێنین کە هەڕەشەی پەرتکردنی پێکهاتەی سووریا و قووڵکردنەوەی دابەشبوونە سیاسی و کۆمەڵایەتییەکان دەکات؛ فرەڕەنگی لە سووریادا هەڕەشە نییە بۆ سەر یەکێتییەکەی، بەڵکو سەرچاوەی هێزە کە دەبێت بپارێزرێت و بچەسپێنرێت. هاوبەشی، نەوەک دوورخستنەوە، بناخەی بنیاتنانی دەوڵەتە.
ئێمە بە روونی و بێ هیچ دوودڵییەک رایدەگەیەنین کە یەکپارچەیی خاکی سووریا بنەمایەکی سازش هەڵنەگرە و کۆڵەکەیەکی پتەوە لە دیدگای بەڕێوەبەرایەتیی خۆسەر و هەموو ئەو هێزە سیاسییانەی لەگەڵماندا لە پرۆژەی گۆڕانکاریی نیشتمانیدا بەشدارن. زیادەڕۆیی لەم دۆسیەیەدا تەنیا خزمەت بەوانە دەکات کە دەیانەوێت دەرفەتەکانی چارەسەری سیاسی تێکبدەن.
ئەو داواکارییانەی ئەمڕۆ دەیخەینەڕوو—بۆ سیستەمێکی دیموکراسیی فرەیی، دادپەروەریی کۆمەڵایەتی، یەکسانیی جێندەری و دەستوورێک کە مافی هەموو پێکهاتەکان مسۆگەر بکات— نوێ نین. بەڵکو کرۆکی ئەوەن کە سووریاییەکان لە ساڵی 2011ـەوە بۆی هاتوونەتە سەر شەقام. رەتکردنەوەی ئەم داواکارییانە و ناوزڕاندنیان بە جوداخوازی، شێواندنێکی بەئەنقەستی راستیی خەباتی سووریایە دژی ستەمکاری.
سووریاییەکان دەیان ساڵ بەدەست سیستمێکی ناوەندییەوە ناڵاندیان کە دەسەڵات و سامانی قۆرخکرد، ویستی نێوخۆیی سەرکوت کرد و وڵاتی بەرەو قەیرانی یەک لەدوای یەک برد. ئەمڕۆ، ئێمە ئاواتەخوازین لە بنیاتنانی سووریایەکی نوێدا ببینە هاوبەشی کارا، سووریایەکی ناناوەندی کە هەموو رۆڵەکانی لە باوەش دەگرێت و مافەکانیان بە یەکسانی مسۆگەر دەکات.
ئێمە بە ئامانجەکانی شۆڕشەکانی 15ی ئادار و 19ی تەممووزەوە پابەندین کە داوای دیموکراسی، دادپەروەری و ئازادی دەکەن؛ دووپاتی دەکەینەوە، بەشداریکردن لە پرۆسەی سیاسیدا بژاردەی ستراتیژیی ئێمەیە. ئێمە بەوپەڕی تواناوە کار بۆ مسۆگەرکردنی سەرکەوتنی دانوستاندنەکان دەکەین و ئامادەیی تەواوی خۆمان بۆ تێکەڵبوون لەگەڵ دامەزراوەکانی دەوڵەت لەسەر بنەمای دیموکراسی و بەشداریکردن لە داڕشتنی دەستوورێکی نوێدا کە رەنگدانەوەی ئاواتەکانی هەموو سوورییەکان بێت، دەردەبڕین.
لەسەر ئەم بنەمایە، داوا لە هەموو لایەنەکان دەکەین بەرپرسیارێتیی نیشتمانی لە ئەستۆ بگرن، واز لە گوتاری رق و کینە و تووندوتیژی بێنن و رووبەڕووی هەموو هەوڵێک ببنەوە کە دەیەوێت وڵات بەرەو ململانێی ناوخۆیی وێرانکەر ببات؛ هەروەها داوا لە هەموو هێزە سیاسییە نیشتمانییەکان دەکەین لەم قۆناخە هەستیارەدا بۆ پاراستنی دیالۆگی سووریایی لە هەوڵەکانی لەباربردن و بۆ بەدیهێنانی ئاواتەکانی گەلەکەمان بۆ دەوڵەتێکی مەدەنی، دیموکراسی و دادپەروەر دەردەبڕین.
لەگەڵ رێزی بێپایان
بەڕێوەبەرایەتیی خۆسەری باکوور و رۆژهەڵاتی سووریا
13ی تەمموزی 2025
