رووداو دیجیتاڵ
سەرپەرشتیاری پڕۆژەی فریاگوزاریی ئاوی هەولێر دەڵێت، پڕۆژەکە 72 کاژێری بە شێوەی ئەزموونی بۆ دانرابوو و بە سەرکەوتوویی تەواو بوو.
رۆژی پێنجشەممە، 17ـی تەممووزی 2025، هێمن نەزیف، سەرپەرشتیاری پڕۆژەی فریاگوزاریی ئاوی هەولێر بە تۆڕی میدیایی رووداوی راگەیاند: "ئاو بەتەواوی گەیشتە هەموو ئەو گەڕەکانەی کە بڕیاربوو لە قۆناخی یەکەمی پڕۆژەکەدا ئاویان پێ بگات، نزیکەی 80٪ـی گەڕەکەکان سوودیان لێ بینیوە و بەشێکی کەمیان ماوە، ئەوانیش هیچ کێشەیان نییە و بە زووترین کات ئاویان پێدەگات".
هێمن نەزیف، پڕۆژەی ئەزموونی فریاگوزاریی ئاوی هەولێر بە "سەرکەوتوو" ناودەبات و دەڵێت: "لە سنووری شارەوانیی چوار، 5 و 6 پڕۆژەکە بە شێوازی ئەزموونی کەوتە کار، چەند رۆژێکە هێواش هێواش قوفڵەکانمان دەکردەوە، ئاو دەگەیشتە گەڕەکەکان تاوەکو هەر کێشەیەکی هەبێت چارەسەری بکەین، بەڵام پڕۆژەکە زۆر باش و بێ کێشە بوو".
13ـی تەممووز، سەرپەرشتیاری پڕۆژەی فریاگوزاریی ئاوی هەولێر بە رووداوی گوت، لە ماوەی 72 کاژێری داھاتوودا بە شێوەیەکی ئەزموونی ئاو دەگاتە گەڕەکەکانی (تورەق - مامزاوا - سەرکارێز - قەتەوی - میرزا ئەحمەد - نازماوە - گردمحەممەد - ژیان - قەرەبووی ژیان - گردەرەشە - قەرەبووی تۆبزاوا - ئاسوودە - رۆشنبیری - فەرمانبەران - زیلان - پێنجی حیسارۆک - گەلاوێژ - ھاوکاری و بێرکۆتی نوێ).
بە گوتەی هێمن نەزیف، ئێستا کار لە قۆناخی دووەمی پڕۆژەکە دەکرێت و لە دوو بۆ سێ مانگی داهاتوودا ئەویش تەواو دەبێت. گوتیشی: "نزیکەی 90٪ـی کارەکانی قۆناخی دووەمی پڕۆژەکە تەواو بووە".
پڕۆژەی فریاگوزاریی ئاوی هەولێر لە هێڵە جیاوازەکانییەوە ئاو دەگەیێنێتە چوار حەوزی گەورە و لەوێوە رەوانەی هەولێر دەکرێت.
پڕۆژەی فریاگوزاریی خێرای ئاوی هەولێر توانای هەیە لە یەک کاژێردا 20 هەزار مەتر سێجا ئاو بۆ هەولێر دابین بکات، کە دەکاتە 60٪ـی پێویستیی هەولێر بە ئاو و 40٪ـەکەی دیکەش لە رێگەی هەر سێ پڕۆژەی ئیفراز (یەک، دوو، سێ) دابین دەکرێت.
