رووداو دیجیتاڵ
وەزارەتی ناوخۆی عێراق رایدەگەیێنێت، تەنیا لە رۆژی شەممەدا 12 هەزار و 150 سەرپێچیی هاتووچۆ لە سەرانسەری عێراق تۆمارکراون و بەغدا زۆرترین سەرپێچیی تێدا بووە، هاوکات سەدان ئۆتۆمبێل و مۆڵەتی شۆفێری دەستیان بەسەردا گیراوە.
وەزارەتی ناوخۆی عێراق ئاماری سەرپێچییەکانی هاتووچۆی بۆ رۆژی شەممە (19-07-2025)ی بڵاوکردەوە و رایگەیاند، پارێزگای بەغدا بە هەردوو بەری کەرخ و رەسافەوە لە پلەی یەکەمدایە بۆ زۆرترین ژمارەی سەرپێچییەکان، دوای ئەویش پارێزگاکانی بابل، نەجەف، کەربەلا و نەینەوا دێن.
عەمید میقداد میری، بەڕێوەبەری بەشی پەیوەندییەکان و راگەیاندن لە وەزارەتی ناوخۆ، رایگەیاند: "بەڕێوەبەرایەتییەکانی هاتووچۆ لە چوارچێوەی پلانی وەزارەتدا، بەردەوامن لە هەوڵە مەیدانییەکانیان بۆ تۆمارکردنی سەرپێچییەکان و رێکخستنی جووڵەی شەقامەکان."
بە گوتەی عەمید میری، ئەنجامی هەڵمەتەکەی رۆژی شەممە بریتی بووە لە تۆمارکردنی 12,150 سەرپێچیی جۆراوجۆر، لەگەڵ دەستبەسەرداگرتنی 123 ئۆتۆمبێل و 80 ماتۆڕسکیل. هەروەها 458 مۆڵەتی شۆفێری و 159 ساڵانەی تۆمارکردن لە سەرپێچیکاران وەرگیراونەتەوە.
دیارترین جۆرەکانی سەرپێچی بریتی بوون لە:
- 838 سەرپێچیی لێخوڕین بە خێرایی زیاد لە رێپێدراو.
- 348 سەرپێچیی لێدان لە چرای سوور.
- 333 سەرپێچیی بەکارهێنانی مۆبایل لەکاتی شۆفێریدا.
- 248 سەرپێچیی رۆیشتن بە پێچەوانەی ئاراستە.
عەمید میقداد میری داوای لە شۆفێران کرد، هاوکاریی هێزە ئەمنییەکان و پۆلیسی هاتووچۆ بکەن "بۆ دروستکردنی ژینگەیەکی سەلامەتتر بۆ هەمووان."
.jpg&w=3840&q=75)
