رووداو دیجیتاڵ
بەڕێوەبەری بەشی خوێندنی کوردی لە کەرکووک دەڵێت، 99٪ـی مووچەخۆریان کارتی بانکیی "هەژماری من"یان تەواو کردووە. راشیگەیاند: "نزیکەی پێنج هەزاریان وەریانگرتووەتەوە".
رۆژی یەکشەممە، 20ـی تەممووزی 2025، کامەران عەلی، بەڕێوەبەری بەشی خوێندنی کوردی لە کەرکووک بە تۆڕی میدیایی رووداوی راگەیاند: "8 هەزار و 500 مامۆستا و فەرمانبەری میلاکمان هەیە، 99٪ـیان کارتی بانکیی 'هەژماری من'یان تەواو کردووە و بەشێکیان وەریانگرتووەتەوە، ئەوانەشی کە ماون دەبێت بچنە قەزای چەمچەماڵ بۆ وەرگرتنەوەی".
بە گوتەی کامەران عەلی، 30 بۆ 40 کەسێک ماون، ئەوانیش لە دەرەوەن یان خۆی پڕی ناکاتەوە.
6 مانگە لە کەرکووک پڕکردنەوەی فۆڕمی 'هەژماری من' دەستیپێکردووە. بەڕێوەبەری بەشی خوێندنی کوردی لە کەرکووک گوتی: "پرۆسەکە زۆر بە باشی و سەرکەوتوویی بەڕێوەچوو، رۆژانە نزیکەی 400 کەس کارتیان بۆ دەگەڕێتەوە".
کامەران عەلی گوتی: "هیچ مانگێک مووچەخۆران لە رێگەی هەژماری من مووچەیان وەرنەگرتووە، بەڵام بڕیارە بۆ مانگی تەممووز مووچە بچێتە سەر هەژمارەکانیان".
لە خوێندنی کوردیی کەرکووک، زیاتر لە 8 هەزار مامۆستا و فەرمانبەر هەن و سەر بە حکومەتی هەرێمی کوردستانن.
بەگوێرەی نووسراوێکی ئەنجوومەنی وەزیرانی هەرێمی کوردستان، لە بڕگەی سێیەمی کۆبوونەوەی ژمارە 13ـی چوارشەممە 2023-08-02 بە ئامادەبوونی مەسرور بارزانی، سەرۆکوەزیرانی هەرێمی کوردستان و قوباد تاڵەبانی جێگری، بڕیاری پڕۆژەی 'هەژماری من' دراوە.
