رووداو دیجیتاڵ
هاونیشتمانییەکی 48 ساڵان، 80٪ـی جگەری لە کارکەوتووە، تووشی نەخۆشی بەمۆمبوونی جگەربووە، تەنیا رێگا بۆ چارسەرکردنی، نەشتەرگەرییە، بەڵام زۆری تێچووی نەشتەرگەرییەکە رێگرە لە چارەسەرکردنی.
نەخۆشەکە ناوی فەرهاد محەممەدە و دەڵێت، "چووم پشکنینم کردووە و دکتۆر دەڵێت، 80٪ـی جگەرت لەدەستداوە و 20٪ـی کاردەکات ئەویش بەرەو خراپبوونە، پێویستە نەشتەرگەری بکەیت ئەگەر نا تووشی نەخۆشیی دڵ دەبیت و گورچیلەکانت لەدەستدەدەیت."
تێچووی نەشتەرگەرییەکە زۆرە و فەرهادیش توانای دارایی نییە.
ئەو دەڵێت، "پێویستم بە یارمەتییەکی زۆرە و لە توانای من دا نییە."
بۆ نەشتەرگەرییەکەی، فەرهاد پێویستی بە بەخشەرێکە، بەڵام منداڵەکانی بچووکن و خوشک و براکانیشی هەڵگری نەخۆشیی درێژخایەنن و ناتوانن پێیبدەن.
دلشاد شێخانی، پسپۆڕی نەشتەرگەریی گشتیی و کۆئەندامی هەرس و جگەر لەبارەی دۆخی فەرهاد باس لەوە دەکات، "نەشتەرگەریی چاندنی جگەر زۆر ئاڵۆزە و پێویستی بە بەخشەر هەیە، دەبێت کەسێک هەبێت نیوەی جگەری پێبدات و هەڵگری هیچ نەخۆشییەکی درێژخایەن نەبێت."
لەبارەی تێچووی نەشتەرگەرییەکەوە، ئەو دکتۆرە دەڵێت، "تێچووی نەشتەرگەرییەکە کێشەیەکی دیکەیە و ئەو نەشتەرگەرییە تەنیا لە کەرتی تایبەت دەکرێت و تێچووکەی زۆرە."
تێچووی نەشتەرگەریی فەرهاد، زیاتر لە 40 هەزار دۆلارە، فەرهاد باوکی 4 منداڵە و ماوەی سێ مانگە بەهۆی نەخۆشییەکەیەوە لە ماڵ کەوتووە و توانای کاریشی نەماوە
