رووداو دیجیتاڵ
بەیانیی ئەمڕۆ بەلەمێکی کۆچبەران لە نۆکەندی ئینگلیز لەکار کەوتبوو؛ چالاکڤانێکی بواری کۆچبەران دەڵێت، "89 کەس بوون و دوای 6 کاژێر رزگار کران."
رۆژی شەممە، 9ـی ئابی 2025، رەنج پشدەری، چالاکڤانی بواری کۆچبەران لە ئەورووپا، بە تۆڕی میدیایی رووداوی گوت، "بەرەبەیانیی ئەمڕۆ نزیکەی کاژێر 08:00 بەلەمەکە لە فەرەنساوە بەڕێکەوتووە و لە نۆکەندی ئینگلیز لەکارکەتووە، بەڵام چونکە کەوتبووە نێوان سنووری فەرەنسا و بەریتانیا، هیچ لایەنێکیان خۆی بە خاوەنیان نەدەزانی و رزگاریان نەدەکردن."
89 سەرنشین لە بەلەمەکەدا بوون کە ژن و منداڵیشیان لەگەڵ بووە. ئەو چالاکڤانە گوتی، "دوای گوشاری زۆری رێکخراوەکانی مافی مرۆڤ و زیاتر لە 6 کاژێر مانەوەیان لەنێو ئاودا، لەلایەن هێزی دەریاوانیی بەریتانیاوە رزگار کران."
بە گوتەی رەنج پشدەری، لەگەڵ کۆچبەرەکان قسەی کردووە و پێیان گوتووە، "زۆرینەمان کوردی رۆژهەڵات و باشووری کوردستانین". ئەوانەی خەڵکی رۆژهەڵاتن بەشی زۆریان خەڵکی سنووری مەریوانن.
پەڕینەوە لە نۆکەندی ئینگلیز چەندین ساڵە بەردەوامە و کۆچبەران لە فەرەنساوە بەو رێگەیە خۆیان دەگەیێننە بەریتانیا.
بەگوێرەی وەزارەتی ناوخۆی بەریتانیا، ئەم ساڵ تاوەکو کۆتاییی مانگی رابردوو، 25 هەزار و 436 کەس لە نۆکەندی ئینگلیزەوە چوونەتە ئەو وڵاتە.
.png&w=3840&q=75)