رووداو دیجیتاڵ
بەڕێوەبەری راگەیاندنی حەج و عومرەی هەرێمی کوردستان دەڵێت، پڕۆسەی ناونووسینی هاووڵاتییان بۆ حەج بە شێوازی دیجیتاڵی پڕۆسەکەی زۆر خێرا کردووە. ئاماژە بەوە دەکات، "لە 24 کاژێردا زیاتر لە 4000 کەس ناویان تۆمارکردووە."
دوێنێ یەکشەممە، پشتیوان سادق، وەزیری ئەوقاف و کاروباری ئایینیی هەرێمی کوردستان لە کۆنفرانسێکی رۆژنامەڤانیدا رایگەیاند، "لەمەودوا ناوتۆمارکردن بۆ خوازیارانی حەج لە رێگەی مۆبایلەوە دەبێ و تۆمارکردنەکەش بێ بەرامبەرە."
رۆژی دووشەممە 11ی ئابی 2025 کاروان ستوونی، بەڕێوەبەری راگەیاندنی حەج و عومرەی هەرێمی کوردستان بە تۆڕی میدیایی رووداوی گوت، ئەم ساڵ ناوی حاجیان بە شێوازی دیجیتاڵی تۆماردەکرێت، ئەمەش پڕۆسەکەی زۆر خێرا کردووە.
ستوونی گوتی، ئەگەر بەم شێوەیە بەردەوام بێت، "پێشبینی دەکەین ئەم ساڵ نزیکەی 100 هەزار کەس ناویان تۆمار بکەن."
پێشتر ناونووسین لە رێگەی فۆرمێکەوە بوو و بڕێک پارە وەردەگیرا، بەڵام ئێستا لە رێگەی لینکەوەیە و بێ بەرامبەرە. کاروان ستوونی دەڵێت، "لەماوەی 24 کاژێردا چوار هەزار و 101 کەس فۆرمە ئەلیکترۆنییەکەیان بۆ حەجی ساڵی 2026 پڕکردووەتەوە."
ناوتۆمارکردنی حاجیان لەو سیستمە ئەلیکترۆنییە تاوەکو 20-09-2025 بەردەوام دەبێت و لە 01-10-2025 تیروپشکیان بۆ دەکرێت.
پار پشکی هەرێمی کوردستان بۆ حەج پێنج هەزار و 134 کەس بوون. بەڕێوەبەری راگەیاندنی حەج و عومرەی هەرێمی کوردستان گوتی، "بڕیارە ئەم ساڵ پشکی عێراق لە حەج زیادبکرێت، ئەگەر زیادبکرێت، هەرێمی کوردستانیش دەگرێتەوە."
.png&w=3840&q=75)
