رووداو دیجیتاڵ
بەڕێوەبەری گشتیی خزمەتگوزاریی کەسوکاری شەهیدان و زیندانیکراوانی سیاسی لە وەزارەتی شەهیدان دەڵێت، دەبێت هەموو کەسوکاری شەهیدان، ئەنفالکراوان و زیندانییانی سیاسی بۆ وەرگرتنی مینحەی مانگی ئەیلوول، کارتی نیشتمانییان هەبێت، "ئەگەرنا مینحەکەیان دەبڕدرێت."
رۆژی سێشەممە 19-08-2025 ئەحمەد مام رەسووڵ، بەڕێوەبەری گشتیی خزمەتگوزاریی کەسوکاری شەهیدان و زیندانیکراوانی سیاسی لە وەزارەتی شەهیدان، بە تۆڕی میدیایی رووداوی راگەیاند، "سیستمی پەیرۆڵ پێویستی بە کارتی نیشتمانییە و چەند جارێک هەموو کەسوکاری شەهیدان، ئەنفالکراوان، بەرکەوتووانی چەکی کیمیایی و زیندانییانی سیاسی کە مینحە لە وەزارەتی کاروباری شەهیدان و ئەنفالکراوان وەردەگرن، ئاگادارکراونەتەوە کارتی نیشتمانی دەربکەن بۆئەوەی مینحەکەیان بەردەوام بێت."
91 هەزار کەس لە کەسوکاری شەهیدان، ئەنفالکراوان، بەرکەوتووانی چەکی کیمیایی و زیندانییانی سیاسی مینحە لە وەزارەتی کاروباری شەهیدان وەردەگرن. ئەحمەد مام رەسووڵ دەڵێت، "تاوەکو ئێستا 41 هەزار کەس، واتە 45.5%یان کارتی نیشتمانییان نییە. دوا کاتیش مانگی ئەیلوولە، بە پێچەوانەوە مینحەیان دەبڕدرێت."
ئەمڕۆ وەزارەتی کاروباری شەهیدان و ئەنفالکراوان لە راگەیێندراوێکدا گوتی، "سەرجەم کەسوکاری شەهیدان، ئەنفالکراوان، بەرکەوتووانی چەکی کیمیایی و زیندانییانی سیاسی کە مینحە لە وەزارەتی کاروباری شەهیدان و ئەنفالکراوان وەردەگرن، بەتایبەتی ئەو وارسانەی کارتی نیشتمانییان نییە، پێویستە بە زووترین کات کارتی نیشتمانی دەربهێنن."
لە راگەیێندراوەکەدا هاتووە، "بۆ ئەم مەبەستە دەتوانن سەردانی بەڕێوەبەرایەتییە گشتییەکانی سنووری پارێزگاکان و ئەو بەڕێوەبەرایەتییەی کە مینحەی لێوەردەگرن بکەن، بە مەبەستی تۆمارکردنیان لە سیستمی پەیرۆڵ، بۆئەوەی گرفت بۆ مینحەکەیان دروست نەبێت."
