رووداو دیجیتاڵ
برایەکی لاهوور شێخ جەنگی دەڵێت، هێزێکی کۆماندۆ چوونەتە سەر ماڵێکی لە گوندی کەلکان لە سنووری ناحیەی خدران؛ پۆلیسی ناوچەکەش دەڵێ: "ئاگادار نین".
ئاراس شێخ جەنگی ئەمڕۆ بە تۆڕی میدیایی رووداوی گوت: "هێزێکی کۆماندۆی یەكێتی کاژێر 07:00ـی بەیانی ئەمڕۆ چوونەتەسەر ماڵەکەم لە گوند و دەرگاکەیان شکاندووە".
ئاراس شێخ جەنگی ئاماژەی بەوەکرد: "هێزەکە هامەر و باجەر و چەکی جۆراوجۆریان پێ بووە. ئەو گوندە گوندی خۆمانە و خانوویەکی بچووکم تێیدا هەیە؛ هەرچی لە خانووەکەدایە بردوویانە".
براکەی لاهوور شێخ جەنگی گوتی: "سکاڵا تۆمار ناکەم، چونکە متمانەم بە کەس نەماوە لای کێ سکاڵا بکەم؟"
عەمید عەلی عەبدوڵڵا، بەڕێوەبەری پۆلیسی کۆیە بە تۆڕی میدیایی رووداوی گوت: "گوندی کەلکان لەڕووی کارگێڕییەوە سەربە ناحیەی خدرانە لە قەزای دووکان و بۆیە ئێمە ئاگاداری بابەتەکە نین".
رێبوار باداوان، بەڕێوەبەری پۆلیسی ناحیەی خدران بە تۆڕی میدیایی رووداوی گوت: "ئاگاداری ئەوە نیم هێز چووبێتە گوندی کەلکان".
22ـی ئابی 2025، دوای زیاتر لە سێ کاژێر پێکدادان لە هۆتێل لالەزاری شاری سلێمانی، لاهوور شێخ جەنگی و پۆڵادی برای و ژمارەیەک لە پاسەوانەکانیان دەستگیرکران.
