رووداو دیجیتاڵ
بڕیارە ئەمڕۆ سێ گەنجی هەرێمی کوردستان لە بیلاڕووسەوە و هەفتەی داهاتووش 25 گەنجی دیکە لە لیبیاوە بگەڕێندرێنەوە.
د. موسەننا ئەمین، ئەندامی لیژنەی پەیوەندییەکانی دەرەوە لە پەرلەمانی عێراق، ئەمڕۆ چوارشەممە 3ی ئەیلوولی 2025، بە تۆڕی میدیایی رووداوی گوت، ئەو 25 گەنجەی لیبیا زۆربەیان خەڵکی ئیدارەی سەربەخۆی راپەڕینن و بەنیازبوون لە رێگەی لیبیاوە بە قاچاخ بەرەو ئەورووپا کۆچ بکەن، بەڵام لەلایەن دەسەڵاتدارانی لیبیاوە دەستگیرکراون.
ئەو ئەندامەی لیژنەی پەیوەندییەکانی دەرەوەی پەرلەمانی عێراق ئاماژەی بەوەش کرد، بۆ گەڕانەوەی گەنجەکان لە هەوڵەکانیان بەردەوامن و بڕیارە رۆژی 9ـی ئەم مانگە بگەڕێندرێنەوە هەرێمی کوردستان. حکومەتی هەرێمی کوردستانیش تێچووی بلیتی گەڕانەوەیان لەئەستۆ دەگرێت.
هەر لەوبارەوە، ئەحمەد سەحاف، کاربەڕێکەری باڵیۆزخانەی عێراق لە لیبیا ئەمڕۆ چوارشەممە 3ی ئەیلوولی 2025، بە تۆڕی میدیایی رووداوی گوت، رێکارەکانی گەڕانەوەی 25 گەنجی هەرێمی کوردستان لە لیبیاوە تەواو کراون و بڕیارە بەمزووانە بگەڕێندرێنەوە. بە گوتەی سەحاف، دەسەڵاتدارانی لیبیا هاوئاهەنگیی تەواویان لەم بارەیەوە کردووە.
د. موسەننا ئەمین گوتیشی، کاژێر 03:30ی دوای نیوەڕۆی ئەمڕۆ، سێ گەنجی دیکەی کورد لە رێگەی فڕۆکەخانەی نێودەوڵەتیی هەولێرەوە دەگەنەوە هەرێمی کوردستان. ئەو سێ گەنجە ماوەی نزیکەی 8 مانگ بوو لە بیلاڕووس دەستبەسەر بوون و بەنیازبوون لە رێگەی ئەو وڵاتەوە خۆیان بگەیێننە وڵاتانی رۆژئاوای ئەورووپا.
