رووداو دیجیتاڵ
وەزارەتی کارەبای عێراق، پڕۆژەی رووناکی هەرێمی کوردستان بە "پێشەنگ، نایاب و سەرکەوتوو" ناودەبات و دەڵێ، دەیانەوێ ئەو ئەزموونەی هەرێمی کوردستان لە عێراق دووبارە بکەنەوە و جێبەجێی بکەن.
ئەحمەد موسا عەبادی، گوتەبێژی وەزارەتی کارەبای عێراق، رۆژی شەممە، 20ی ئەیلوولی 2025، لە کاتی بەشداریکردنی لە بووڵتەنی ئابووریی تۆڕی میدیایی رووداودا رایگەیاند: "پڕۆژەی رووناکی کارەبای 24 کاژێری هەرێمی کوردستان نموونە و پێشەنگە. وەک وەزارەتی کارەبا، بەدواداچوون بۆ هەموو پڕۆژەیەکی سەرکەوتوو دەکەین و بۆ مەبەستی ئاگاداربوون و ئاشنابوون بە پڕۆژەکە، سەردانی هەرێمی کوردستانمان کردووە. هیوادارین ئەم پڕۆژە سەرکەوتووە لە عێراق جێبەجێ بکەین، بۆیە بەبۆنەی ئەو ئەزموونە سەرکەوتووەوە پیرۆزباییتان لێدەکەم".
گوتەبێژی وەزارەتی کارەبای عێراق ئاماژەی بەوەش کرد، پڕۆژەکە کاریگەری لەسەر ئەوانیش هەبووە و گوتی: "پێشتر هەرێمی کوردستان 1,800 بۆ 1,900 مێگاوات کارەبای پێدەداین، بەڵام ئێستا بەهۆی پڕۆژەی رووناکییەوە بۆ 1,100 مێگاوات کەمیکردووەتەوە، چونکە ئەو بڕەی لە چوارچێوەی پڕۆژەکەدا بەکاردەهێنێت".
ئەحمەد موسا عەبادی گوتی: "بۆ سوودوەرگرتن لە گاز و کارەبای هەرێمی کوردستان، پڕۆتۆکۆڵی کار و رێککەوتنی گەورە لەنێوان حکومەتی ناوەندی و هەرێمی کوردستان کراوە. هاوکاری لەنێوان کارەبای ناوەندی و کارەبای هەرێمی کوردستان هەیە و میکانیزم و زەوینەی هاوبەش بۆ سوودوەرگرتن لە گازی هەرێمی کوردستان هەیە".
سەبارەت بە بەرهەمهێنانی کارەبا لە عێراق، ئەحمەد مووسا گوتی: "ئێستا 28,100 مێگاوات کارەبا بەرهەمدەهێنن، لە کاتێکدا عێراق بۆ دابینکردنی کارەبای 24 کاژێری، پێویستی بە 55,000 مێگاوات کارەبایە."
عێراق گرێبەستی کڕینی گازی تورکمانستانی واژۆکردووە، بەڵام تاوەکو ئێستا رێککەوتنەکە جێبەجێ نەکراوە. ئەحمەد موسا گوتی: "رێککەوتنەکە هەڵنەوەشاوەتەوە، لە رووی تەکنیکییەوە کار و رێکارەکانی پڕۆژەکە تەواو بوون، بەڵام لە رووی داراییەوە چاوەڕێی دابینکردنی پارەین لەلایەن وەزارەتی داراییەوە. بۆ کڕینی 16 ملیۆن مەتر سێجا گاز رەزامەندیی ئەنجوومەنی وەزیران وەرگیراوە، بەڵام تەواوکردنی رێکارە داراییەکان پێویستی بە رەزامەندیی گەنجینەی ئەمریکایە".
عێراق سنووری هاوبەشی لەگەڵ تورکمەنستان نییە و دەبێ لە رێگەی ئێرانەوە ئەو گازە هاوردە بکات. ئەمریکییەکانیش تاوەکو ئێستا رێگرن لە جێبەجێکردنی رێککەوتنەکە، چونکە سزایان بەسەر ئێراندا سەپاندووە.
گوتەبێژی وەزارەتی کارەبا گوتی، وەزارەتی کارەبا و حکومەتی عێراق لە دانوستاندندان لەگەڵ ویلایەتە یەکگرتووەکانی ئەمریکا بۆ رازیکردنی تاوەکو رێگە بە هاوردەکردنی گازی تورکمانستان بدات، چونکە ترسیان هەیە دامەزراوە بانکی و داراییەکانی عێراق رووبەڕووی سزای ئەمریکا ببنەوە، لە چوارچێوەی ئەو سزایانەی ئەمریکا بەسەر ئێراندا سەپاندوونی.
